ZALEN, Apr. 02, 2026: India-a coffee zirna tha ber zinga mi, Specialty Coffee Academy of India chuan India hmarchhaka a hmasa ber atan Mizoram an lut ve dawn a, April 20 atangin Aizawlah zirtirna an tan dawn a, mi 10 tan chauh hawn a ni thung.

Kilen Cafe, Zonuama zirna kalpui turah hian Specialty Coffee Association of India (SCAI)-in a pawmpui (certified) trainer, National Barista Championship-ah pawh lo endiktu (judge) lo ni tawh, Paul Manohar-a'n zirtirna a pe ang.

Mizorama class kalpui tur hi Kilen leh Benki Brewing Tools tangkawpin an chah chhuah a ni a. Class hmasa ber hi Crop to Cup Course niin April 20-ah tanin April 24 thleng a awh dawn a. Coffee kung atanga roasting leh a siam dan chikim an zir dawn a ni.

Zirna kalpui tur hi India rama coffee association lian ber, SCAI hriatpui a nih avangin a zirten certificate an lak leh an thiamna chu India mai bakah khawvel hmun hrang hranga specialty coffee dawr apiangah a hman theih vek ang.

Mi 10 tan chauh zirna hi hawn a ni dawn a, a inziak lut duh tan www.scai.coffee-ah emaw, Ph. No. 6009752071-ah emaw tih theih a ni.