ZALEN, Apr. 08, 2025: Armed Veng South tleirawl, Zothansangi chu season liam ta chhunga India hmarchhaka hmeichhe ball vawm thiam ber chawimawina chi hnih hlan a ni.

4th NECDC Achievers’ Nite-ah Mizo cricket-te an hming a langsar a. Zothansangi bakah Lalramluahpuia Zote leh Johan Lalbiakkima te pawh kum 19 hnuai lam mipa zinga hmarchhaka ball vaw thiam ber leh vawm thiam berah thlan an ni bawk.

India hmarchhaka cricket-in hma a sawn theih nana state parukte inzawm khawmna, North East Cricket Development Council (NECDC) chuan Pathianni zan khan Gangtok, Sikkim-ah rorel inkhawm tum 10-na (10th NECDC Conclave) an neih rualin season liam ta chhunga mi mal che tha chawimawi hun, NECDC Achievers’ Nite an hmang.

Zothansangi hi Best Bowler in Under-19 Women’s Category for BCCI Domestic Season 2024-25 leh Best Bowler in Senior Women’s Category for the BCCI Domestic Season 2024-25 chawimawina hlan a ni.

BCCI season liam khan Zothansangi hian kum 19 hnuai lam hmeichhiate inelna chi hnihah wicket 14 a la a. Twenty20 inelnaah vawi nga inlanin wicket li a la a, One Day-ah vawi nga a khelhah mi 10 zet a vawm hlum bawk.

Puitling huang inelnaah pawh wicket 16 a la a. Twenty20-a vawi ruk a khelhah leh one day vawi sarih a khelhah wicket riat ve ve a la a ni. 

Kum 19 hnuai lam mipa huangah Mizo player pahnihin chawimawina ngaihhlut lain Ramluahpuia chu Best Batsman in Under-19 Men’s Category for the BCCI Domestic Season 2024-25 chawimawina hlan niin Ramhlun Venglai bowler Johan-a hnenah Best Bowler in Under-19 Men’s Category for the BCCI Domestic Season 2024-25 hlan a ni thung.

Zemabawk batter Ramluahpuia hian season liam ta khan ni khat aia tam khelh chi, Cooch Behar Trophy-ah vawi nga inlana thawh (innings) kua a vuakah run 358 a thawk chhuak a, a vuak chhuah tam ber tumin run 150 a siam a. Over bituk awma kum 19 hnuai lamte inelna, Vinoo Mankad Trophy-ah vawi nga khelhah run 104 a siam bawk a, a vuak chhuah tam ber tumin a tawp thlenga damin run 57 a siam bawk.

Johan-a thung hi Coach Behar Trophy-ah vawi nga khela thawh riat a vawmah mi 36 zet a vawm hlum a. Vinoo Mankad Trophy-ah vawi nga a khelhah mi pasarih a vawm hlum thung.

Ramhlun Venglai rawlthar hi a vuak lamah pawh a thawh hlawk thei viau a, Cooch Behar Trophy-ah run run 180 vaw chhuakin Vinoo Mankad Trophy-ah run 50 a vaw chhuak bawk.

10 NECDC Conclave leh 4th NECDC Achievers’ Nite hi Sikkim Chief Minister Prem Singh Tamanga-a’n hmanpuiin chawimawina pawh a hlan a ni.