ZALEN October 25, 2023 : Assam Lok Sabha Congress MP Pradyut Bordoloi chuan BJP chu mi thenhran tuma hma la thin, mi inkara huatna tuh hmang, sakhaw tihbik nei leh sakhaw pakhat vulh len tuma hmala thin an ni a ti a, Hmarchhakah erawh a nihna thupin hma an la niin a sawi.

Vawiina thuthar thehsdartu te a kawmnaah Bordoloi chuan BJP te hi Mizoramah an mahniin an lut ngam lo a, hei vang hian state tinah regional party te thawhpuiin hma an la a, a langsarah awm duh lovin hmatheh atan heng tualto party te hi an hmang a, an duh danin an hruaikawi ta thin niin a sawi.

Ni 177 zet Manipur-ah buaina a chhuah tawh hnuah pawh Prime Minister Narendra Modi a ngawi reng chuan hmarchham mite a ngaihtuah tak tak loh zia a tilang chiang hle. Biak In leh Kohhran hmun tam tak tihchhiat a nih hnuah pawh a ngawi reng a, he buaina chungchangah tun thlengin a ngaihdan pakhatmah a la sawi lo niin a sawi.

Manipur buaina chungchang Lok Sabha-ah Congress kaihhruai INDIA in sawiho an ngen laiin Mizoram MP C. Lalrosanga chuan engmah sawi lovin a ngawi reng niin a sawi bawk.

Assam MP chuan tun inthlanah pawh BJP thawhpui MNF chu hnawl a hun tawh a ti a, BJP chu India ram puma sakhaw hrang hrang te dinhmun tiderthawngtu leh sakhaw pakhat vulh len tumtu a nih thu a sawi.

He hunah hian Assam MP Pradiyu Bordoloi bakah Arunachal CM hlui, North East Congress Co-ordination Committe Chairman Noban Tuki, MLA chu a tel bawk a ni