Kar kal taa khawvel huap inelnaa bronze medal lo la tawh, Durtlang râwlthar, C. Lalramsanga chuan Yonex-Sunrise India Junior International Grand Prix 2024-ah bronze pahnih a lak belh leh ta.

Ramsanga hian Kotak India Junior International Series 2024-a khan Pragati Parida nen tang dunin mixed doubles-ah brone a lo la tawh a. Tun tumah hian Parida nen an tan dun leh bakah under-19 men’s doubles-ah Param Choudhary nen an tang dun a. Bronze an la phak ve ve a ni.

Pune, Maharashtra-a Thawhlehni atanga inelna hi Pathianni khan zawh a ni a. Mixed doubles-ah hian first round-ah Chinese Taipei mi, Cheng Han Tsai leh Chiao En Yu-te tangdun chu 21-18, 21-13-a hnehin second round-ah Saurav Sahu leh Zenith Abbigail (India) inkawp chu 21-11, 21-18-in an hneh leh a, quarterfinal an lut.

Quarter final-ah hian kar hmasaa Hyderabad, Telengana tournament-a thil thleng ang bawkin Mizo an intum nawn leh a. Lalrempuii leh a kawppui, Arsh Mohammad te tang dun chu Ramsanga te thiandun hian deciding-ah 11-21, 21-19, 23-21-in an hneh a, semifinal an lut.

Semifinal-ah hian Indonesian inkawp, Mohammad Vito Annafsa leh Keyla Annisa Putri te tangdun hmachhawnin deciding game-ah, 21-17, 15-21, 21-15-in an tlawm a, bronze medal-ah an lungawi a ngai ta a ni.

Ramsanga hi Hyderabad-ah khan international level badminton tournament-a Mizo zingah medal hlawhchhuak hmasa ber a lo ni tawh a, tun tumah phei chuan pahnih lai a vaw chhuak leh ta a ni.

U-19 men’s doubles-ah Ramsanga te thiandun hian first round-ah Indian tho, Mridul Jha leh Angad Muchal-te inkawp chu 21-14, 17-21, 21-16-in an hneh phawt a, second round-ah Chinese Taipei pair, Huang Hong-Yu leh Yan Bin Huang-te chu 21-16, 19-21, 21-18-in an hneh leh a. Quarter final-ah pawh harsatna tawk lovin Chris Anjen Baptist leh Rehaan Phutela (India) tangdun chu 21-15, 21-12 in an hneh leh.

Semifinal-ah inhnehtawk takin Indian pair tho, Bhavya Chhabra leh Arsh Mohammad (Seeded No. 2) te hmachhawnin 22-20, 21-19-in an tlawm a, bronze an la leh a ni.

TATA Trusts, NEIDA, Mizoram State Sports Council leh Mizoram Badminton Association (MBA) te thawhhona kaltlangin Ramsanga hian a badminton zinkawng a tan a, Pullela Gopichand Badminton Academy-ah hun eng emaw chen a awm a. Tunah erawh Badminton Association of India (BAI)-in a din, National Centre of Excellence, Guwahati-ah a inzir mek.

Mizoram leh India tihmingthatu hi MBA chuan a chhuang tak zet zet a, a medal lak avângin lawmpuina a hlan a. Training tha taka a chhunzawm theih nan leh tournament a hmachhawn lehzel turah hlawhtlinna sang zawk a chan zel theih nan duhsakna sang ber an hlan tih an sawi.

Mizo shuttler dangte thlen chin

Pune tournament-ah hian Mizo pali an tel a. Mized doubles-ah Rempuii inlanin quarterfinal-ah Mission Veng Badminton Club-a khel lai, Ramsanga te hmaah an tlawm a. U-19 women’s doubles category-ah second round a thleng bawk.

H. Lalthazuala (U-19 men’s singles) leh Lalrinkimi (U-19 women’s singles) te pawh first round-ah an tla ve ve.