Article

Hmasawnna daihzai lo

Admin - Mar 22, 2021

Hmasawnna daihzai lo

- Engkima Chawngthu

Aizawl hi khawpui thang duang leh hmasawn tak mai kan ni a. Khawi lai vengah pawh hian in sa thar leh sorkar hmalakna thar  a awm chho ve ta reng mai a, a lawmawm hle mai. Amaherawhchu, kan hmasawnna kalpui dan hi kan ngaihtuah chian ngai deuh hi a awm em aw ka ti thin. Vantlang thatna tur ang lang si a, mi thenkhat harsatna siam thei ang chi te, mi thenkhat hamthatna tura mi tam zawkin harsatna kan neih theihna te, mipui vangtlang mamawh leh duh dan pawh hre lem lova hmasawnna kalpuite pawh hi  a awm nawk awm e.

Mi tam zawk tana sawtna anga lang, mi thenkhat tan tawrhna: Hmanni khan Aizawl tlak lama panga veng chhunga pa thenkhat chuan an veng chhunga SIPMIU pipe an phum tur duh lovin  hnathawktute an lo hawntir a. A chhan pawh a hma lamin an vengah  lei a min avangin mi tam takin in leh lo an chân a, chu miah chuan leimin an tawrh chhanah khan SIPMIU lei laih kha an chhuanlam deuh a. Chumi venga SIPMIU pipe  an phum lehna  tur  veng chhung paten duh lovin, “Nakinah kan tan chhiatna thlen thei a ni, in hnathawkte kan hmuhin a tha tawk lo va, kan in kawtah bomb in phumah kan ngai. In tui pipe phumte hi leak se la, kan veng hi a mual tawlhin a tawlh thei dawn a, kan in leh lote hi kan chân phal lo a ni,” a ti ta a ni.

Tuna tui pipe lian phum tur hi a nihna takah chuan Aizawl tui sem chawmtu tur a ni a, mi tam zawk chuan kan sawtpui theih tur a ni. Mahse, he lai veng paten an sawi ang deuh hian tui pipe hi leak ta sela (an hna hi a tha lutuk lem lo bawk a ni ang e), he lai venga in tam tak hi chhe ta se la sorkar hian mawh a phur ngam ang em? Sorkar hian a leak lo ang tiin tiamkamna a siam thei ang em? Mipui tam tak tan a thatna tur anga kan ngaih hi mi thenkhat tan chuan chhiatna zakhua thlen theitu tur a nih miau chuan hmasawnna kan kalpui dan hi kan kan ngaihtuah that leh deuh chu a ngai viau awm e. A tuartute tuar dan tur en hian mipui thatna tur pawh nise kan kaltlangpui loh mai ngam thinte hi a tul mai lo maw? Tun hma lama ka thu lo hriat ve chu, ‘TATA company hian eng anga tam pawh lo seng tawh mah se mipui tana thil tha lo tur chu an bânsan ngam thin’ an ti. Mipui thatna tur thawktu sorkar pawh hian mi thenkhat tana harsatna tur hi chu engzata tam pawh sen ni mah se a tihpuitlin loh ngam hi a tulin a lang.     

Mi thenkhat tana tha, a nawlpuia kan chhiatpui: Hmasawnna kalpui hi daihzai leh rintlak a nih fo hi ngai reng a. Tun hma deuh tawh atang khan vawiin thleng hian hmasawnna chhuanlam hian mi thenkhatte hlawkna tur atan hian mipui tam zawkte tan harsatna namen lo kan thlen mek niin a lang bawk. Entirna han pe leh ta ila. Vaivakawn kawn lai takah mipui kalna tur an siamte pawh hi  tute emaw contact pekna remchan tak a ni a, mipui kalna tur chhuanlamin kawn lai leh kawngpui kan tichep mek niin kei chuan ka hria. Mihring kalna an siam hma hian, dawr bathlarah two wheeler a dah theih nual a, dawr kawt thenkhatah chuan motor dintir theih thin kha tunah chuan a theih ta lo. Kawngpui a chep vek a, motor dinna a tlem a, motor inpelhna a zim a, a rei ang a, Vaivakawnah chuan a hma aia nasain traffic a jam ngei dawn a ni. 

Hmasawnna kawng ang lang si, awlsamna aia harsatna min thlentu zawk hi a tam mai. Tunah pawh hian kea kalte hmakhua ngai awm taka langin kea kalte hi dinhmun harsa leh hlauhwmah kan dah a. Sorkar lamin motor park-na tur a awm lo tiin PAHOSS-ah nuai sang chuang kan sen laiin motor park-na titlem zawng leh kawngpui tichep zawng hian hma kan la leh bawk si a. A chang hi chuan sorkar theuh theuh pawh hi a inkalh mai emaw tih mai tur a ni. Hmasawnna daihzai nei tura tan kan lak a tul viau awm e.

Tun sorkar chauh ni lo hian a hmasa lam atang tawh hian hetiangah hian party chhunga induhsakna tur hna siamna leh contact inpekna kawng hi kan dap mah mah  thin, a rem leh rem lo pawh thlu lem lo hian hmasawnna tih hming pu hian kan kalpui mai ni hian a lang. Veng hrang hrangah hian  step repair, vawn ban vuah, chequered  tile belh kan tiawl lo va, rem leh rem lovah chhan mumal awm si lovin step kan siam tawp a,  side  drain rem leh rem loah kan hung fer fur thin a nih hi maw.  Hetianga mi pakhat duhsakna hian in mi tam takte tan harsatna kan siamsak mek a ni. Hmsawnna hlawk zawk leh awmze nei zawk kan kalpui a va tul em!

Mipui mamawhna hre lo hmasawnna: Aizawl khawpuiah traffic signal (pedestal signal) hi an dah thluah mai a. A dahtute hian eng rilru puin nge an dah ang aw ka ti thin. Heng khawl hi hmang ila Aizawl traffic hi chu a buai nasa khawp ang le! Aizawl chuan motor ke pali karah two wheeler kan hui liam zeuh avanga te, ke pali nena insu si lova kan insulpel liamtir avangin traffic jam nasa tak turte kan pumpelh a, traffic light khan two wheeler a hre hrang ve tawh dawn si lo va, kan buai hi a zual tingin a rinawm. Hmasawnna hming pu hian thil thenkhat hi kan ti ve tak nain mipui mamawhna leh a tangkaina tak tak hi ka ngaihtuah lo nge ni a, kan hre hre reng a, sum siam nan mai hian kan ti zawk tih hi hriatthiam a har thin. Project thenkhatin mi dang tana thil tha ti angin ngai si hian a mamawhtute  zawt lem lova lo in lei risk-sak mai maite pawh hi awm fo ni awm tak a ni a. Hengte hi chuan an tangkaipui tur angin an tangkaipui viau kher lo mai thei a ni. 

Kan Aizawl khawpui hi a zauh zelna tur kawng kan dap mai rih si lo va, mipui leh motor, bungrua kan neih a pung zel a, khawpui hi cheiin kan theih ang angin hmasawnna pawh kan kalpui zel dawn chuan a lang. Chu miah chuan hmasawnna daihzai tak, kan sawtpui tlan tur leh him si hi kan ngaihtuah zel hi a ngai ta tak zet mai. A nih loh chuan hmasawnna hmingpu hian mi thenkhat tana chhiatna leh buaina, mipui tam zawk tana hlawkna awm lo mai ni lo buaina zakhua kan thlen thei a ni tih hriain hmasawnna daihzai nei i tum teh ang u.