ZALEN Nov. 20. 2024; Hmeichhia two wheeler khalh thiam an tam, a chhe siam thiam erawh an tam lo ang. Zotlang, Aizawl a khawsa K Lalbiakdiki chu a pasal hnungzuiin two wheeler mechanic a ni a, an eizawnna ber pawh a ni.

Fa pali nei tawh K Lalbiakdiki leh a pasal David Zohmangaiha hian eizawnna atan an chenna in, Zotlang, Aizawl-ah two wheeler workshop an siam a, two wheeler silna an siam tel bawk.

K Lalbiakdiki chuan two wheeler chhe siam chu a pasal hnung a zui thinna atanga a thiam a ni tih a sawi. Two wheeler chhiat dan hrang hrang a siam thiam a, engine down thlengin a khawih thei.

Mizoram hmun hrang hrangah hmeichhe two wheeler khalh an tam tawh, a chhe siam thiam erawh an tamin a rinawm loh. Eizawnna atana hmang phei chu K Lalbiakdiki lo midang an awm a nih pawhin kut ṭang thliah tham lek an awm a rinawm.