Aizawl; Cyber crime thubuai chu kum tina pung zelin zahmawh rawngkaihhnawih a tam ber a, tunhnai hian hmeichhia buma pawisa laksak ching an awm tan niin CID Crime chuan ZALEN a hrilh. Mizoramah kum 2009 atanga kumin 2014 inkar chhung khan Cyber Crime thubuai 37 ziah luh a ni tawh a, hemi chhunga thu buai 14 te chu kumin chhunga ziahluh a ni. Mizoram Police hnuaia Cyber Crime Cell-in a chhin chhiah dan chuan, kum 2009 -2014 inkar ah thubuai ziahluh tam ber chu saruak thlalak leh mipat hmeichhiatna hmang lai video theh darh chungchang a ni bawk a. “Cyber Crime hi a pung zel a, tunlai hian pawisaa inbumna a hluar tan mek a, hmeichhia te chu tutih hriat lohte’n Facebook leh social media kal -tlangin an be nel a, sap (hnam dang) nia insawiin pawisa an chhuhsak thin a ni,” tiin CID Crime chuan Zalen palai a hrilh. “Case pakhat kan neihah chuan ram dang mi anga hmeichhe pa-khatin a lo kawm nel tawh chuan bungrua a thawn thu leh a lamna hmun tur a hrilh a. A hmun a thlen chuan bungrua chu a rih em avangin pawisa tam tham tak an chawi---tir a, a hnuah an bum tih a hrechhuak a ni,” tiin kan thulakna chuan a sawi a ni. Hemi bakah hian cyber bullying case a hluar tan a, thubuai anga lak theih hleih theih loh turin internet hmangin mi an tibuai thin a. “Hetiang case hi a awm nual tawh a, SMS, whatsapp, Facebook leh social media hmangin mi an chhaih thin a. Pawisa inchawi tirin an inrem ve bawk thin a ni,” tiin kan thulakna chuan a sawi. Ram dangah chuan Cyber crime thlen chhan tam ber chu phuba lak nan emaw, hlimhlawp nan emaw, sum leh pai hlawhchhuah nan emaw tih a ni thin tlangpui a. Mizoramah chuan hlimhlawp nan leh huat zawngte tihmualpho nan cyber crime hi tih a ni deuh ber a, pornography (saruak thla lak) leh copyright buaina a langsar hle bawk. Mizoram CYBER THUBUAI hmasa ber 20.5.2009 niin Reverend 1 chuan Aizawl SP hnenah FIR theh lutin, FIR-a a lan dan chuan mi tu tih hriat loh ten a e-mail password o thlak sakin, a e-mail Account hmangin a thian hrang hrang mi engemawzat hnenah amah chu London a zina, a pawisa ip ti bo vek leh hotel bill pawh pek tur nei tawh lo anga in sawiin, pawisa US $ 2,500 chu Western Union kaltlanga puktir turin an lo dil tih a hrechhuak a. Thilsual tih tumtu te hi ram dang mi (Nigerian) mi nia rin a ni.