Aizawl - Miss Mizoram Foundation (MMF) chuan International Womens Day pualin March 8 hian HYVE-ah Women & Child Department (WCD) ten tang hovin hun an hmang dawn a, he hunah hian Mizo hmeichhe entawntlak an tih mi pathum an chawimawi dawn.

MMF chuan he hunah hian Champhai Deputy Commissioner hlui Maria CT Zuali bakah Social worker RTC Lalduhawmi leh Gospel Lallawmzuali te chu an chawimawi tur te an ni. 

Maria CT Zuali hi MMF chuan Dan a lal theihna atana Huaisen taka hmalatu tiin. Dan lova sumdawnna a do dan leh lo neihna hmuna  insak te a thenfai dan leh Kuthnathawktute tana a hmalakna te leh Tourism lama a hmalakna avang chawimawi tur a ni a, heng an tehna te hi Champhai DC a nih laia a hmalakna te an ni deuh ber. National Commission for Protection of Child Rights (NCPCR) chuan ruihhlo laka naupang te venhimna kawng hma a lakna that chawimawina Award a dawn te chu an tehkhawng pakhat a ni bawk.

An chawimawi tur RTC Lalduhawmi hi zaithiam, Album 13 zet siam tawh a nihna vanga chawimawi tur a ni lo a, khawtlang rawngbawlna lama a inhman dan avanga chawimawi tur a ni. Naupang harsatna nei leh humsual dai te enkawl leh puih kawngah a thawhhlawk hle, a theihna hrang hrangah a pui thin. Naupang ten Pathian an hnaih theih nan program hrang hrang te a siam thin bakah an nun kaihhruai thei tur film leh cartoon te a buatsaih sak thin bawk a ni.

Chawimawi tur zinga naupang ber Gospel Lallawmzuali, Zualte/Gospeli hi BSc a zir atangin a zirna phuhruk turin hostel warden, tawng lettu hnate thawkin, MSc zira University a rah hnuah pawh mi in tifaiin a inhlawh thin a ni. Tunah hian Mizoram University ah PhD a ti mek a, midangte tanpui chu a damchhan niin a hria a ni. 2019 February thla khan Asia khawmualpui a hmeichhiate tan bika siam Wedu Rising Star ah thlan a ni. Asia World Model United Nations Bali, Indonesia neihah Mizo zing a tel hmasa ber niin Best Delegate nihna  a dawng bawk a. 2020 khan Women Achiever Award Women and Child development atang a dawng tawh a. Forever Star India award te hlan a lo ni tawh bawk.