Hmeichhe inkhelh thiam ber Alexia Putellas

Rin lawk ang ngeiin Barcelona captain Alexia Putellas-i chuan 2021-22 season chhunga hmeichhe inkhel thiam ber chawimawina, Ballon d'Or a dawng.

Kum 28-a upa midfielder hian nikum khan he chawimawina hi a lo dawng tawh a, mahse vanduaithlak takin nipui lai khan hliam a tuar a, Spain-in Euro 2022 an khelh tum pawh khan a inlan ve thei lo a ni.

A inhliam hma hian Putellas hian tha takin season a khel thei a, Barca tan Champions League top scorer a ni a, game 10 khelhah goal 11 a thun thei a ni. Arsenal striker Beth Mead chu pahnihna niin, Chelsea forward Sam Kerr chu pathumna a ni thung.

England nula Mead hi Euro 2022-ah player ṭha ber atan thlan a nih bakah Golden Boot a dawng bawk.

Putellas hian Euro khel theilo mah se 2021-22 season chhung khan captain ni chungin Barca chu domestic league-ah a treble champion pui a, season thum chhung a zawnin Spanish league nomawi a chawipui bawk. A team hian league match 30-ah hnehna an chang vek a, Putellas hian goal 18 a khung a, assist vawi 15 a nei bawk.

Ballon d'Or a zawna a chakna chungchangah Putellas chuan, "He hmuna ka rawn kir leh thei hi ka lawm hle a, kum khat kalta khan he chawimawina hi ka lo dawng tawh a, dawn zel duhnain zanin hian min nawr a ni," a ti.