ZALEN, June 14, 2026 : Border Security Force (BSF) sipai, Silsuri West-a post an nih laia hmeichhia pawngsual rawn (gang rape)-a a hnua acid-a leih zuia puhte chu Addl. District & Session Judge I, Sylvie Z. Ralte chuan June 12, 2026 khan thiam loh a chantir tawh a. Vawiin khan a hremna hi puan a ni a, an pahnih hian kum 42 ve ve lung in tang turin a hrem ta a ni.  

Thiam loh chang ta, Nilanjan Das leh Dinesh Kumar te hremna hi vawiin khan puan niin Mizoram chhunga court-in acid hmanga inbeih a rel vawi khatna leh hremna an pek hmasakber nia hriat a ni. Tuna thiam loh chantirte hi a hnuaia mi ang behchhan hian hremna hi pek a ni.

IPC - Section 376D - Pawngsual rawn (gang rape) thubuai niin kum 20 chhung hrehawm taka tang tura tih an ni a. Pawisa fai Rs 20,000 an pek theih loh chuan thla 2 dang an tan belh leh ang.

IPC Section 376(2)(m): Pawngsual bakah mi taksa na taka hliam thubuai niin kum 10 chhung hrehawm taka tang tura tih an ni a. Pawisa fai Rs 20,000 an chawi theih loh chuan thla 2 tan belh turin an chung thu rel a ni bawk a ni.

IPC Section 326A: Acid hmanga inbeihna thubuai niin kum 12 leh Rs 20,000 sum fai chawi tura tih an ni ve ve a, an pek loh chuan loh chuan thla 2 tang turin Court chuan thutlukna a siam a ni.

IPC Section 302: Tualthah thubuai niin hmeichhe pakhat zawk ruang chu a chhiat tawh avangin forensic lam chuan evidence rintlak tak an nei thei lo a, hemi-ah hi chuan chhuah an ni.

ZALEN thudawn danin July 18, 2017 khan Silsuri West, Mamit district, Marpara Police Station-ah FIR ziakin a lut a. FIR atanga a lan danin Mithun Chakma chuan July 16, 2017, 11:00 AM leh 5:00 PM velah a farnu leh a thiannu pakhat chu Gaskata lui-ah chakai khawrh leh thlai la turin an kal a. He hmunah hian an mi hriat ngai loh pahnih chuan pawngsual rawnin a hmai chu ‘vun tikang theiin’ an leih zui a. Pawngsual tawktu chuan a thiannu awmna chin a hre lo bawk a ni.

Hemi hma, July 17, 2017-ah biakhlatnain police-te chuan thil thleng chu hriaiin hnuchhui an tan tawh zawk a. A chhui hna chu SDPO, West Phaileng-in a kutken a. July 18, 2017 khan PHC Phuldungsei-ah victim hi enkawl tura hruai niin pawngsual a ni tih finfiah niin a kawng, awm bawr leh a malahte hliam a tuar a, acid nia rin kanna hnuhma vangin a hmai a chhe nasa hle a, khua a hmu hmu thei lo a. A hliam a nat avangin Civil Hospital, Aizawl-ah dah luh leh a ni. 

Hemi ni vekah Marpara Police Station-ah Section 326A, 376D, 376 (2)(m) leh 34 IPC tlawhchhanin thubuai ziah luh a ni ta a ni.

ZALEN document neihin a tar lan danin pawi khawih tuartu sawi dan chuan a thiannu nen July 16, 2017-ah ramah chakai khawrh tur leh lakhuihthei la turin an kal a, BSF mipa pahnih tiffin sei tak khai an tawk a. A thiannu chu zung tura a pen bo laiin BSF uniform ha mi pahnih chuan amah chu nangchingin an pawngsual rawn a ni. 

Bottle fim phawrhin a hmaiah thil tui an leih a, a hmai a kang a, na a ti hle a, khua a hmu zui thei ta lo a. Kalsan a ni a, miin an hmuh hnuah an chhungte an hriattir a, hruai haw a ni. 

Pawngsual tawktu thiannu pawh zawn zui a nih hnuah July 27, 2017-ah pawi khawihna bul lawkah a ruang hmuh niin post-mortem a ni a. Forensic zirchianna chuan thah niin a ngai thung.

Pawngsual tawkin a thil tawn lai a thawmhnaw hakte chu khawm nghal niin Forensic Science Laboratory (FSL)-ah endik tura thawn a ni a. Hmeichhe thi tawh ruang atang leh an thuamhnaw atang chuan acid (corrosive substance) hnuhma an hmu leh bawk.

Pawikhawihna chhuitu police officer te chuan 181 Batallion BSF Camp pawh an luhchilh a, duty tur ruatna an en hnuah BSF sipai pahnih - Nilanjan Das leh Dinesh Kumar te chu hemi ni-a ei tur petu/semtu an ni tih hriatchhuah a ni a. ‘Biological sample’ lak kawngah BSF thuneitu lam chuan police an ti khawtlai bawk a ni. 

Court hmaah hian thuhretu 18 daktawr leh FSL tiamin mi 18 an ding bawk.

September 5, 2017 khan Judicial Magistrate chuan mi eng emaw zat chu BSF uniform a thuamin rinhlelh pahnih pawh an tel a. Heng mi hi Test Identification Parade (TIP) a neihpui a, pawi khawih tuartu chu an hmel entir niin Nilanjan Das leh Dinesh Kumar te chu a kawk ta a ni.

Rinhleh pahnihte chu medical test hrang hrang forensic examination hmanga neih a nih hnuah a chhuitu lam chuan Nilanjan Das leh Dinesh Kumar te hi Section 302, 326A, 376D leh 376 (2)(m) IPC-a hrem theih an nih thu court-ah an thlen a. Court chuan Zirtawpni (12.06.2026) khan thiam loh a chantir ta a ni.