ZALEN November 20, 2024 : November 19, 2024 (Thawhtanni) a National Highway laih hna kal mekah Seling khawchhunga a paltlang tur ram neitu, hmeithai Lalhmangaihi In ding lai, JCB hmanga nawrchhiat sak a ni kha Mizo National Women Front chuan an dem a. Dan chunga leng ang maia hleilen a, chaklo zawkte nekchep leh diriam a ni hi a pawi an tiin, an tawrhpui tih thuchhuah an siam.

MNWF chuan, "Kawngpui sial hna kal mekah a hna thawktu NHIDCL hnen atangin Zangnadawmna a dawn tur ang pawh la dawnglo, an khua Seling mipui leh khawtlang hruaitute pawh hrilhlawkna awmlo a, Aizawl Addl. DC kaihhruaina hnuaia thuneihna leka rikrap a ni hi thil rapthlak tak, Mizoram a thlengnawn tawhlo tur atan kan duh takzet a ni. Hmeithai harsa zawkte chhawmdawltu tur sawrkar rikrapna hnuaia, mittui tlazawih zawih leh awrawl tawpa Lalhmangaihi tana tahna thlen a ni hi kan thinlung a na takzet a ni," an ti.

"Hmeithai rethei leh puih ngai zawk tana Seling mipui, khawtlang hruaitute leh Centre for Environment and Social Justice(CESJ), Mizoram ten an hmalakna hi kan thlawp tlat a, a hlawhtlinna thleng ngei se, a tuartute tawrhna tuam damtu ni ngei turin hmalatute duhsakna kan hlan bawk a ni," an ti bawk.