Aizawl Municipal Corporation huam chhunga awm Chaltlang -Bawngkawn- Durtlang kawng an tawn tawnah In sak tumte chuan kawng atanga tehin feet 50 zuah awl turin thupek khauh tak siam a ni a. Kawng thlanga sa tur phei chu In chung chhawng chung ber chu kawngpui level atanga feet 20 aia hnuaiah a awm tur tih tarlan a ni bawk. Aizawl Master Plan 2030 tlawhchhanin helai hmun humhalh duhna atanga lo chhuak a ni a. AMC, UD&PA te pawhin a hmunah tlawhin an zir tawh a. Hemi hma hian INTACH, YMA leh E&F Department te chuan hmun thengthaw nuam tlem te kan neih zinga mi a nih tawh avangin kawng tawn tawnah in sa lo turin mipui te a ngen a ni. Khawpui hnaih ah hmun thengthaw nuam a tam tawh lo a, mi ramah te chuan ‘a tak ang thei tur berin a lem an siam chawp a, sum tam tak an seng a ni’. 'Chhuan' lo awm leh zel tur te chuan ramngaw leh khuannu kutchhuak awmsa te chu an hre lo mai dawnin an hriaa, an theihnghilh loha hlutna chang an hriat nan sum vaibelchhe tel tak meuh an seng ngam a ni. Mizo te hian ‘siki’ takngial pawh chawi miah lovin khuanu kutchhuak mawi tak kan nei thluah a, hlutna chang hre lovin kan awm renga; mi thahnem ngaite zarah hma kan sawn ve hret hret a; kan vanneih zia inhrilh mawlh mawlha hun tawh e. Kan khawpui hi ruahmanna ‘plan’ felfai tak nena din a ni loa, Sap missionary te khan hmun tlemteah ruahmanna an siama, an haw hnu phei chuan 'Dan' awm mahse bawhchhetute hrem an nih ngai hriat a ni lova, dan palzut duhna a intuh nghet zela; endiktu lamin hmaizah an pe naa, endik hna pawh dawhkan atanga chil fen theih hial nia sawi te pawh a awm thin kha. Hei vang hian ruahmanna tha awm lovin kan khawpui a thang a, ‘concrete ramhnuai’ ah kan chhuah ta der mai le. Awmze nei zawka khawpui zauhna tur Aizawl Master Plan 2030 tlawhchhanin thupek khauh tak tihchhuah a ni hi a lawmawm hle a, Sawrkar leh NGO te'n In sa lo turin ngenna siam tawh mahse hetianga thupek khauh tak maiin a zui hi tunah chuan a fuh dawnin a lang a ni. Heng lai hmun hi khampang chheng chhe tak tak te ni mahse mimal ram a ni deuh vek tawh a, laklet ni tur chuan sum tam tak sen a ngai a, thil hautak tih hleih theih loh tur niin a lang reng a. Dinhmun awkai taka awm emaw intih laiin Aizawl Municipal Corporation in thu a lo dah tawh bawhzui a ni a, thlawp a hlawh a beisei awm a ni. Mipui lam pawhin lawm nachang hria sela hmalak zel a phurawm phah sawt ang. Tunah a hlutna la hre lo mah ila, hun a liam anga a hlu tulh tulh dawn a ni. Hnam ro hlu leh thil hlu dang humhalhah tan lakna chang hria an awm nual tawh a, heng mite hian theih tawp an chhuah a, mitinin mahni mawhah la theuh ila harsatna a tlem phah a rinawm hle. Hman fing apiangin hmasang atanga an thlahtute sulhnu an vawng tha a, an tobul ah an chiang hlawm hle a ni, chumi kawngah chuan Mizo mipui hian tuna hmalakna hi bul tan that nan hmang ila, rah tha tak sengtu turte chu keini leh kan fate lo chu an awm chuang lo. Chanmari-Chaltlang, Bawngkawn-Durtlang kawng hi hmun ‘bik’ ah puan a ni tawh bawk a, Dan kengkawhtute’n khauh takin vil sela, mipui pawhin thlawp sela, cheibawl a nih hunah phei chuan khualzin hiptu a nih a rinawm. Heti rual hian Aizawl khawpui chauh ni lo, khaw dang thang mek ah te pawh hetiang hmun thengthaw nuam ang hi Sawrkar hian chhin chhiahin hmathlir thui tak nen a tangkai a rin awm a. Hmalam thlirin bul tan tawh ila !