ZALEN Oct. 21, 2025 : Mizoram Police zingah, ram leh hnam tana nunna hlan mi 54 (sawmnga leh pali) an awm tawh

October 21 hi India ram pumah "Police Commemoration Day" atan hman thin a ni a,October 21, 1959 khan DCIO Karam Singh hona hnuaia 3rd Battalion CRPF police party tlemte chuan Ladakh hmuna Hot Springs area, tuipui atanga feet 15000 - 16000-a sangah ramri venga an patrol chu Chinese sipai, ralthuam famkim leh hmanraw tha tak taka thuam te chuan lo lambunin police sawm (10) in nunna an chan a, police pasarih (7) te chu hliam tuar chunga man an ni bawk. He thil thlen hnu, 1960 kuma ‘Annual Conference of IGP of States and UT’ neih chuan October 21 chu ‘Police Commemoration Day’ atana pawm turin resolution an pass a. Chutiang chuan kum 1960 atang khan October 21 hi kum tin Police Commemoration Day atan hman thin niin, State khawpui leh District Headquarters tinah India ram humhalhna kawnga inpekna sang ber, mahni nunna hlantu police martar huaisente chawimawina ni atan hman thin a ni ta a ni.

September 1, 2024 leh August 31, 2025 inkar khan India ram pumah police mi 191zetin ram leh hnam tan nunna an hlan a. August 15, 1947 atanga August 31, 2025 thleng hian police mi leh sa 36637 zet ram leh hnam tana nunna hlan an awm tawh bawk.

Kumin chhung hian vanneihthlak takin Mizoram Police zingah duty laia hmelma kuta thi an awm lo a, kum 1966 atanga vawiin thlengin Mizoram Police zingah, ram leh hnam tana nunna hlan mi 54 (sawmnga leh pali) lai an awm tawh a ni.Mizoram-ah pawh October 21, 2025 zing dar 7 khan Police hmunpui hrang hrang, District Headquarters leh Battalion Headquarters-ah te Commemoration Parade hi neih a ni.

Mizoram Police hnuaia Commemoration Parade hmanna pui ber hi "Martar Thlan", 1st Bn. MAP Headquarters, Armed Veng, Aizawl-ah neih a ni a, Mizoram Police senior officer-te bakahCRPF, SIB leh Assam Rifles atanga officer pawimawh lo kalte nen urhsun taka martarte sunna neih niin, martar thlanah zahna pangpar dah a ni.