Aizawl February 27, 2024 : Vawiin khan Congress Thalai President Laltawnliana leh Senior Vice President Ngurdingpuia te chuan Vairengte leh a chhehvel khuaa Hmunphiah chingtute harsatna enin a hmunah an kal. MPYCC President chuan Chief Minister chu Hmunphiah chungchanga mawhphurhna la ngam lovah an puh.

Laltawnliana chuan, "Hetianga Hmunphiah chingtu Kuthnathawktute nasa taka an buai lai hian Mizoram Chief Minister berin, he thilah hian sawrkarin thiam loh a nei lo, Agent te thiam loh a ni, kan tuar tlang a ni ber, a ti chu mawhphurhna la ngam lo Chief Minister a nih zia chiang takin a lantir a ni. Hmunphiah chingtute hian an hralh theih loh chhan ni lovin, an hralh theih dan tur, a solution hi an hriat duh leh mamawh a ni. 'Kan tuar tlang' tih hi tuna Chief Minister, Minister leh MLA te, inthlan dawna affidavit thehluhah pawh hausa tak takte leh Hmunphiah chingtute mi harsa te tawrhna hi huang khata dah chi a ni lo, inpalzutna a ni," a ti.

MPYCC President chuan, "Hmanni lawkah Chief Minister Pu Lalduhoma'n Press Confenrence-ah Hmunphiah chungchang sawiin, “Kan lei ang” a ti a, a hnu lawkah a leina tur cheng Vbc. 110 nen lam kan dah fel vek tawh a ti bawk. RR Associates te hian fin kherek chhuahin lei lo mah se, Hmunphiah chingtute Hmunphiah thar chhuah hi sawrkar hian a ranglama leisak thuai turin kan phut a ni," a ti bawk.