Aizawl September 4, 2024 : Aam Aadmi Party chuan vawiin khan Mizoram State Assembly Speaker Lalbiakzama chu ziakin thil an hmuh dan an thlen a, Assembly zawh taka thu ngaihtuah leh sawi hona neih chungchanga an ngaihmawh zual te an thlen a, Hmunphiah lei tuma Agreement ziah chungchangah Vai hming an chuang lo an ti.

AAP chuan, "Hmunphiah hralh chungchangah hnamdang zawk mawhpuh an ni a, mahse Agreement kan en hian Vai hming a chuang lo hrim hrim a, kan sawrkar hian tihhlawhtlin tak tak a tum si loh hi mipui thenkhat lungawi nana ngaihven ang taka lan a tumna mai a ni lo maw? Khawvel changkang chho zelah engkim hmuh theih leh hailan zung zung theih tawhna khawvelah hian House chhungah hian thudikin hmun chang se kan duh hle," an ti.

"Research base-a thil ti ni-a insawi hi an research hi a rintlak tawk lo niin kan party chuan kan ngai a ni," an ti bawk.

Chief Minister-in kuhva chin khap a nih chungchang a sawi pawh hi tun aia chiang zawka hetiang dan hi a awm a nih chuan tuin nge he dan hi siam a, tu nge a sawitu tih hi chiang takin sawi ni thei se an duh tih Speaker hnenah hian an thlen a ni.

Assembly House hi mi rethei leh mi te ber ten a leirem an lo rah ve theihna tura rorelna hmun a ni a, dawt leh mimal na tak tak a an in beihna hmun tur a nilo tih hi hre thar leh turin MLA te AAP chuan an ngen bawk a ni.