Aizawl February 14, 2023: Vawiin khan Ex-MNF Multi-Purpose Cooperative Society hmalakna a Hmunpui rama Ex MNA Bamboo Plantation chu Ex-MNA hruaitu, MNF Media Dept aiawh leh Journalist thenkhatten an tlawh a, Mau kung sing nga sang nga chuang to tawhin a puitling mek tih a hmuna tlawh te chuan an sawi.

Hmunpui rama bamboo plantation hi hectare 170-a zau a ni a. Ex-MNA Multi-Purpose Cooperative Society chuan a tirah mau kung 80,000 vel an phun, dam hi 55,000 - 60,000 inkar a awm niin an ngai a, mau chi hi D. Brandisii leh D. Sikkimensis niin, July 2021 khan an phun tan a ni.

Ex MNA Bamboo Plantation tlawhtu te chuan, "Tunhnai khan MPCC-ten helai hmun chungchangah bamboo plantation area chhung luhchilh lovin - a ram hmawr, huan lu lam hmun sam fai lai thla lain 'Mau phun puitling a awm lo, sum siamna mai a ni' an ti a. ZPM-te pawhin a hmun tak tak lut lova an ralkhat beih avangin February ni 14, 2023 hian Ex-MNA, MNF Media & Publicity Dept aiawh leh Journalist-te chu a hmunah kalin mau hmun hi kan tlawh a, a hmun enkawltute sawi angin mau phun nung - puitling mek kung 55,000 chuang a awm tih finfiahin, a hmunhmate kan tlawhho bawk a ni," an ti.