Aizawl June 9, 2024 : NEIGHRIMS bul, Mawkasiang, Shillong-a damlo leh an awmpuitute tana Mizoram sawrkarin in a sak mek, patients’ lodge tur sak hna thlen chin chu a la thui lo hle a. He lai hmun a building lo sak tawh chu a hna a chhiat avangin chhu thiatin a bul atanga tan that a lo ni tawh.

Mawkasiang-a patients’ lodge sak mek a hmuna ZALEN-in a tlawhnaa hmuh danin, tun dinhmunah peih fel turin hmabak a la thui hle a, a bul tan mek ang la niin, ground floor tur peih fel a la ni lo a, a vaia zo fel turin hun a la duh deuh tur a ngaih a ni a. A awmna hmun hi NEIGRIHMS atangin motor-a rei vak lo tlanin thlen theih a ni.

May 18, 2022-a sawrkar thuchhuah a tar lan a lo nih tawh danin, patients’ lodge sak nan hian Rs. nuai 4,19,67 ruahman niin, a sakna tur sum first instalment Rs. nuai 167.87 chu October 20, 2021-ah pekchhuah a ni.

Patients’ lodge sak mek hi room 40 awm tura ruahman niin, a hmun hi feet 360 x 253 x 270 x 392-a zau a ni a. Enkawltute chenna tur leh tul dangte pawh a remchan dan anga sak belh zel tum a ni a. Helai hmun hi March 20, 2014 khan Meghalaya sawrkar atangin luah phalna Mizoram sawrkarin a hmu.

Hetihlai hian patients’ lodge sak dan hi a that tawk loh avangin a bul atanga sak thattir leh a lo ni tawh a. Chief Minister Lalduhoma’n January 20, 2024-a thuthar thehdarhtute a kawmnaah patients’ lodge chungchang hi sawi chhuakin, “Mi pakhatin contractor pakhat hmingin he hna hi a hmu a, a thawh hleih theih loh bakah, a thawk chhia a. NEC fund hmanga sak a ni a, an lungawi lo a, tihtawp an tum,” a ti.

Shillong-a Mizote pawh an mangan thu sawiin Lalduhoma chuan, “Hna hmutu tak chuan a khawih tawh lo. A hming neitu contractor chu tlawmngaia thawk chhunzawm turin kan ngen a, a hmaa miin a lo thawh tawh kan chhut chhiattir,” a ti a, a tharin hna an tantir thu a sawi.

CM Lalduhoma chuan, in sak mek chu chhut chhiat ni mah se, sum ruahman zat a pung thei chuang lo tih sawiin, "Kum hnih chhunga zawh tur kum khat chhunga zawhtir kan tum. December velah chuan zo tawh turin kan ti a, a zawh chiah loh pawhin a hriatthiamawm khawp ang," a ti.         

NEIGRIHMS leh Mawkawkasiang a patient lodge sak mek tlawhtu ZALEN palai hmuh danin, Mizoramah damlo inenkawlna duhthusama a la that tawk loh avangin inenkawlna tha zawk dawng turin mi tam takin NEIGRIHMS an pan a, Mizoram House atangin NEIGRIHMS awmna a hlat bakah a panna senso a sang a, hemi vang hian Mizo damlo tam takin NEIGRIHMS chheh vel a mimal enkawl lodge/hotel an bel thin.