Guwahati: Hna tha zawk awm nia insawia Mizoram chhunga awmte Guwahati a inhruai thlaa bum thin leh mi dang bum tir thintute an rem tawh emaw tih laiin tunlai hian hetiang anga buaina tawk buaipui ngai an awm leh mek a, fimkhur tur leh pawisa an phut lawk thin te chu ngaithla lo turin Guwahati Mizoram House hnathawkte chuan mipui an chah. Thudawnna in a sawi dan chuan Mizoram hmar lam khua a cheng te chu Rs 15,000/- vel chawiin Guwahati ah zirna rei lote zawh hnua hna tha zawk hmuh theih nia bumin hruai thlak an ni fo thin a. Thla 2/3 chhunga Retail Sales, BCA, Chartered Accountant course leh a dangte zirzoa hna pek chu Mizo thalai te hnenah tawk tarhin an thlen thlak hnuah hlawh mumal pek theih an nih loh avangin buaina tawkte thawn haw leh buaipui thahnem tak an awm tawh. Hnathawk te chu midang 4 zel Rs 15,000/- theuh kenga an hruai thlak theih chuan hlawh pekah intiamin, thalai thenkhat chuan an thiante hruai thla nualin a tawpah mi 100 chuangin buaina namenlo an tawh phah niin House hna-thawk te chuan Zalen an hrilh a. ‘An bum dan hi sum tlachawp network marketing downline ang deuh virkualtir mai maia innghat a nih avangin rintlak an ni loa, awih lo tur leh police a report thin turin mipui kan chah a ni,’ tiin House enkawltu pakhat chuan kan palai a hrilh bawk. Thudawnna in a sawi zel danin hetiang a thlen hluar lai chu kum 1 kalta a ni a, tunah hian hetiang mangang hi House lam-ah puihna dila tlulut an tawng leh tan a. ‘FIR thehluhah inthurual hleihtheih a nih loh avangin mipui te chu media hmang hrilhhriat vat a fuh niin kan ring a ni,’ tih Zalen an hrilh bawk.