Aizawl: Mizoram Youth Commission (MYC) chuan exam hrang hrang paltlangte tana pawisa dawn theihna tur Incentive Cash Award Scheme a kalpui dan tur order chu tun kar khan a chhuah. MYC chuan exam hrang hrang paltlangte sum dawn theih dan tur hi chi hniha siamin Rs. nuai 1 leh Rs. 50,000 dawng thei turte a bithliah a. An order siam hi April 1, 2018 atangin hman tan a ni dawn a, hemi hmaa pass leh inziak tlingte chuan an dil thei dawn lo niin MYC hotute chuan Zalen an hrilh. Rs nuai 1 dawng thei turte hi Civil Services (Main) Examination, Combined Defence Services Examination leh NDA/NA Examination a tlingte an ni. Rs 50,000 dawng thei turte hi Civil Service (Prelim) Examination, Combined Medical Services Examination, Engineering Services Examination, Central Police Forces (Assistant Commandants) Examination, Indian Economic/Indian Statistical Service Examination, Geologists Examination, Indian Forest Service Examination, Special Class Railway Apprentices Examination, CAT cleared and admitted at IIM, IIT-JEE (Advanced) cleared and admitted at IIT, Govt of India hnuaia group A post ICAR, DRDO, ISRO, RBI, IBPS, leh a dangte zawng zawnga inziak tlingte an ni. Heng bakah hian UGC Recognized University a Gold, Medalist te, SSB leh SSC kaltlanga a sipaia lut te, Military Nursing Service (MNS)-a inziak tlingte a huam bawk. MYC chuan dilna form hi a la lakchhuah theih loh thu sawiin kumin April 1 hnu lama tlingte chauhin an dil thei dawn niin an sawi a. Hemi hmaa heng exam hrang hranga inziak tlingte chuan an dil thei dawn lo niin an sawi bawk. MYC chuan an order ah hian application form mumal tak an la siam dawn thu leh hetah hian document ken tel ngai pawh an ziah tel dawn thu an sawi a. He order hi a tul chuan siam that leh a nih dawn thu MYC hotute chuan an sawi bawk.