ZALEN August 31, 2025:: Kumin hian Hnahlan leh Champhai winery chuan grape an lei leh a. Hnahlan winery hian lei hi duh tawk tawhin quintal 750 vel an la a, Champhai erawh chuan a rem dan angin an la lei chhunzawm.

ZALEN-in Hnahlan Grape Growers & Processing Cooperative Society hruaitute chuan kumin hian grape rah qtls. 750 an la tih sawiin kg. khat Rs. 60-a leiin a man an pe nghal zel a. Kuminah Hnahlan chhevelah grape thar quintal 1,000 chuang a awm nia thudawn niin kuthnathawktu tam tak chuan winery-a hralh lovin an um niin an sawi a, hetia an um hi winery a hralh aia a hlawk zawk vang niin an sawi.

Hnahlan winery hian grape tui sawr sa, la thun (bottle) loh litre 50,000 vel a la awm a. Grape tui hi hralh chak lutuk lo mah se, zawrh tura winery atanga la hi an la awm reng nia sawiin chawhrualin thla khatah case 300 vel an tiral niin an sawi.

Champhai Grape Growers Society pawhin grape an lei leh mek a. A huanah Rs. 43 leh winery-ah Rs. 60-in an laksak a. A man pe nghal lovin an batsak rih a, nikuma an lakna pawh an la pe kim thei lo niin society hruaitute chuan Zalen an hrilh.

Champhai winery hian grape tui sawr sa, la hralh loh litre nuai khat vel an kawl mek.

Champhai Winery hian wine hi chi 3 - Champ Wine, Champ Wine Premium leh Sacramental Wine an siam a. Champ wine hi 750ml niin um khat Rs. 225-in an hralh a, Champwine premium hi 375ml niin Rs. 112.5-in an pe a. Sacramental Wine hi Rs. 200-in an hralh thin.

Hnahlan Winery hian grape atang hian Isabella siam chhuakin um khat 750 ml niin Rs. 350-in an pe a. Champwine 750 ml hi Rs. 400 leh Isabelle hi Rs. 500-in an zuar a ni.