Aizawl: Mizoram Merchant Association (MIMA) chuan hnam dang Mizorama sumdawn tum te'n Central GST Act, 2017 hmanga ILP tellova GST registration tih theih chu hnam tana a him loh avangin tihtawp anih theih nan hma lak zel an tum tih Zalen an hrilh. MIMA President PC Laldinthara chuan Aizawl-a Central sorkar hnuaia GST Commissioner Office-ah an leng tawh tih sawiin Central GST Act, 2017-a ILP tel lova hnam dang sumdawngten GST Registration an ti thei chu hnam tan a him loh thu leh hnam ral leh ral loh chu an kutah a awm tih an hrilh niin Zalen a hrilh a. Hetih lai hian Office of the Commissioner, GST, Govt of India lamte hian tih theih an nei lo niin MIMA an lo hrilh niin PC Laldinthara chuan a sawi bawk. Central sorkar hnuaia registration lo ti vetu GST Commissioner Office lam hotute chuan GST System-a a awm loh avangin ILP chu an lo dil ve ngawt thei lo tih MIMA hi lo hrilhin sorkar laipui lama GST Council pawhin India ram pum tana chhiah chi khat siam an nih avangin state thenkhat hman tur bika dan han siam danglam chu a harsat an rin thu an lo hrilh niin MIMA President chuan a sawi. PC Laldinthara chuan Central GST Act siam danglamtir chu thil buaithlak tak a ni dawn tih a sawi a. Remchang hmasa berah political party zawng zawng leh NGO zawng zawngte chu MIMA-in hemi chungchang rel tur hian ‘joint meeting’ neihpui an tum niin a sawi bawk. “Mizoram Taxation Department chu GST lamah board member an ni a, meeting ah pawh an kal tha thin viau a, hemi chungchang hi an rawn sawi ngai lo niin GST Commissioner Office lam hotute hian min lo hrilh,” tiin MIMA hotute chuan an sawi bawk.