Tunhnai khan Mizoram Merchants Association (MIMA) hmalaknain Zarkawt leh Dawrpui Local Council te leh Kuhva Zuar Association te chu inhmukhawmin sumdawnnaah hnamdang hming hawhtir thin chu ti tawh lo turin mipui an ngen a, hmalakna neih tumin mipui thlawp turin an ngen bawk a ni.

He sawihona leh hmalak tumna hi thil pawimawh tak mai a ni a, hnam anga Mizote’n kan buaipuina a rei tawh a rah tha erawh hmuh mai tur a awm thin lo hi a pawi  a ni. Hetiang tih ching te hian hnam angin thlir thiam tawh sela, Mizo sumdawng dang te hmakhua a khawih pawi a ni tih hriat nawn a tha awm e. Thalai sumdawnna luh chilh tum te rilru a khawlo thei a, an kawng tipingtu a ni thei bawk.

Kan sumdawng pawlte’n tuna hmalak an tum dan aia hmalakna zau hi awm thei sela, sumdawnna dang leh sumdawnna lian zawkah pawh hetianga hnam dang hming hawh tira sumdawng hi an awm reng em? tihte chhui chiangin hmalak ni thei se a tha khawp ang.

Sumdawnna kalphungah chuan bungraw inang rau rau-ah ‘a to’ leh ‘a tlawm’ tih hian kori a tu ber a. Sumdawnna sawi a nihin Mizote zia nia sawi hlawh fo thin chu ‘hlawk thuai thuai tumnate, thawk lemloa sum hmuh tumnate’ a ni a. Hemi vang hian sumdawnna thenkhatah mipui lam hian an Mizo pui te an rin ngam loh avangin a tlawm zawk an pan leh mai thin niin a lang  thei bawk. Mizo sumdawngte inenlet a tulna chen a awm mai thei. Chuti chung chuan hei hi kan dinhmun pawh nise mahni thawh ni miah loa hnamdang hming hawh tir hi ‘thawk lemloa sum hmuh tumna’ a nih avangin  dawrtu mipui lamin an hriat thar a ngai khawp mai.  Hah taka thawktu Mizo sumdawng te hi dawr thin ni zawk sela mipui tih tur pawh a niin a lang a ni.

Hmarchhak state thenawm ngeiah pawh hnamdangte’n sumdawnnaah a leilung fate an awp behna hmun a awm tawh a. Mipui lam pawhin Mizo sumdawng te hmalakna hi hriatpui ila, hnam chhanna tura hmalakna lian tak a nihna hi pawmpui ang u.