Mizorama sumdawng pawl MIMA chuan AR Lammuala Trade Expo neih mek chu khar tura thupein, khar a nih tak loh avangin ni tinin tihbuai an nih thu leh vauna te an tawh thu media te hnenah a sawi a. Civil Court-in MIMA chu inthiarfihlim lailawk tur thupek a chhuah hnuah MIMA lam chuan Aizawl DC hnenah sawiselna thlenin phalna a lak loh vanga tihtawp an duh thu an thlen a. DC chuan Sec 144-in Expo chu a kharsak a. Huaihawttu chuan India danpuiah sumdawmna chanvo a neih vang leh dik lohna a nei lo nia inhriain High Court, Aizawl Bench-ah a hrana phalna petu an awm loh thua thlen a, India danpui chu dan tesepin a hneh theih loh thu a sawi chhuak bawk a ni. Mizoram chhunga hnam dang sumdawng khuahkhirhna dan hi buaipui a nihna a rei tawh a, vawiin thlengin thu buai titamtu a ni mek a ni. India khua leh tui dik takte chu Indian Danpui (Constitution)-in ram chhung khawiah pawh sumdawn theihna chanvo a pe a. Chutih rualin a tlawhkhalhna siam lehin state sawrkar chuan a huam chhunga cheng lote tan sumdawnna a khuahkhirh thei a, India President phalna lak a nih hnuah chutiang dan chu State Legislature chauhin a siam thei leh bawk a ni. Hetiang danah pawh hian khap bur a kawk lo a, khuahkhirh a ni zawk a, ngaih pawlh loh pawh a tha khawp ang. Mizoram chuan non-Tribal sumdawnna khuahkhirhna dan chu India President phalna lain 1974 khan a siam a, kum 10 chhung chauh dam tur a nih avangin kum 30 lai liam ta, 1984 khan he dan hi a thi tawh a, vawiin thleng hian Legislature-te’n sumdawnna dan an la siam thei lo a ni. Hetiang hi tun dinhmun a ni a, dan hmanga a tak ram thlirin sumdawnnaah Indian Citizen tupawhin a duh a nih chuan a luhchilh thei a, kawngkapui lianpui luh chhuah theihna a inhawng tihna a ni. Kan awmna a kilkhawr a, leilung hausakna a tam em em lo bawk nen, hetiang dinhmunah kan awm tih hre fuh an tam lo a nih hmel a, a hre fuh tlemte chauh an awm a, sumdawng turin an rawn lut mang lo mai zawk niin a lang a ni. Zalen taka tu tan pawh sumdawn theih tih hi a darh palh chuan leilung fate chu sumdawnnaah chimral thuai theih kan ni dawn tihna a ni a. Kan state thenawm lawkah pawh hetiang hi a thleng mek a, leilung fate rethei zawkah an tang a, hnam dangte chu sumdawnna lian chelhtu an nih phah ta hial a ni. Tunlai khawvelah chuan a thei thei dam chhuahna a ni tawh a, beh laklawh chuan a nei zawkte chuan sum peipunna an zuan zel a, sum virtir tur nei lo zawk na na na chu leilung fa nihin kawngro a su lo a ni. Lammuala Trade Expo thubuai hi a darh a hlauhawm hle mai a, tun hma chuan inbiak pawhna a tha lo a, zia tak a awm a; mahse, information technolgy a tha tawh a, mel za tam tak atang pawhin thil thleng a hriat theih tawh si a, dinhmun derthawngah kan ding mek a ni. Tun dinhmun kan awm phah nachhan chu dan hriat loh leh zah lo taka pawl an chet vang niin a lang a, a huho emaw, pawl emawa awm vangin thuneihna mahni kutah inpek kan awlsam a, eng emaw chen chu theih dan a awm mai thei a; mahse, Danpui khawih a nih tawh chinah chuan tu pawh phuar emaw, zalen emaw an ni tawh a ni. Hnam dang inhnialte chu inkhawih miah lovin an insual thei a, a tlangpuiin tlang mite kut a rang thin a; mi dang pawi sawi a awl bik a, dan hnuai kan awm avangin a thiam lo zawk, a tuartu zawkah kan awm phah fo. Tuna a lan danah chuan Expo tibuaitute chu Danpuiin thiam loh a chantir thei niin a lang a, thutlukna a lo chhuah hunah a chiang mai dawn a; hei hi a tawpna a nih a rinawm loh a, a la kal dawn chauh niin a lang a ni. Hnam tlemte kan ni a, inchimraltir duh lohna rilru a lian a, chutiang veng tura tlawmngai pawl an awm thin hi mipui tan chuan a thlamuana thlak hle a ni. Engpawh nise, mi dang pawisawi a nih tawh chinah chuan danah chuan inang khat vek kan ni a; chuvangin, thawm dim hun a ngaih chang a awm lo thei lo. 'Thluakin tharum a hneh thei lo,' tih tawngkam a awm a, tlawmngai pawlte pawhin dan leh hrai te hre hmasa sela, dan pawh dan hmang veka hneih theih a ni fo thin a ni. Hnam dang sumdawnna khuahkhirhna hi kum 30 kalta chhung khan siam that tum a lo ni tawh a; mahse, tlawmngai pawlte’n dan an hriat loh luatah phalna petuin a hnawl tawh a, fimkhur a ngai a, finrawl chhuahin tanrual a ngai bawk a ni. Chuti a nih loh chuan a insah huk palh ang e.