‘S.Malsawmtluanga’ han tih hian a jersey hnunga ‘Tulunga’ tia a hming inziak a hak kha mi tam tak chuan an mitthla nghal ngei ang.

Tun hma deuh, kum 2000 leh 2010 vel, Mizoten phai lama tih tak zeta football an khelh tan lai vela hmahruaitu, ‘Mama’ tia hriat lar bawk hian a vanglaiin India ram club hlun leh tha, East Bengal leh Mohan Bagan kawr hain Kolkata khawpui a lo al hneh viau tawh thin a, club dang dangah a khel tawh bawk.

Mama hnungzuitu hi tam tak an chhuak tawh a, an chhuah zel pawh a rinawm a bawk a. Chung mite tan chuan thu chahin, “Hnam dang zinga football player ni turin tawng thiam a pawimawh a, tlangnel tur pawhin tawng thiam bawk a ngai,” a ti.

Ningani zana Aizawl District Football Association (ADFA)-in silver jubilee an lawmna puala Dawrpui Multipurpose Centre-ah sport-a tui mite nena inkawmhona (conclave) an buatsaihah national level-a sadai theutu Mama hi panel-ah thuin a hnungzuitu leh zui tumte a fuih.

Mama hian Mizorama football hmasawnna tura pawimawh a tihte sawiin coach puitling mamawh a nih bakah player ei leh in (diet) uluk leh hun vawn dik pawimawh a tih thu a sawi.

ADFA kum 25 tlin lawmna puala Mizoram State Sports Council (MSSC) sponsor-a hun hmanah hian Mizoram leh Indian football sawihoa zawhna leh chhanna hun hman a ni a. Panel- ah hian Mama leh Indian Super League (ISL)-a ATK Mohun Bagan tana khel mek, Lalthathanga Khawlhring (Puitea) bakah MSSC Secretary John Tanpuia MCS, MFA Senior Vice President Vanlalhruaia Pachuau leh ADFA Hon. Secretary Lalbiakhlua te an thu a ni.

MFA Sr. Vice President PC Vanlalhruaia’n Mizorama football than dan leh ADFA din dan te a sawi a. MSSC secretary-in sorkarin sports, a bikin football tihmasawn tura theihtawp a chhuah dan leh hmachhawp te a sawi ve bawk.

ADFA Silver Jubilee Conclave-ah hian ADFA President Er. Lalzawmthanga hoin ADFA hruaitu te, an hnuaia zone paruka hruaitu leh footballer hranghlui bakah football ngainatu tam tak an tel.