Kan ram thenawm Myanmar ah khuarel chhiatna thlengin a nghawng an tuar mek a, tui lian vangin khawlaia chhungkuaa riak chhuak an kat fur a, hmun hul panin thenkhat an inzui dul dul a; nunna chan tam tak an awm a ni. Tuilian hian Manipur leh a chhehvelah nunphung a tibuai hle bawk. Myanmar hi democracy ram ni mahse hmun tam zawkah sipai sawrkar a la thu hle a, ram dangte pawhin insumdawn tawnna an titawp a, an puihna sum an hreksak fo bawk a ni. Chuti chung chuan a inhawng tha duh chuang loa, mahse, he chhiatna hi a nghawng a na em a, ramdang te hnenah puih (international aid) a dil ta nge nge a ni. Tunah nitin chakkhai leh mamawh an thawn lut reng a, Mizoram atang pawhin pawl, political party leh mi thahnem ngai te'n bungrua, sum, ei leh in an thawn lut nual tawh a ni. Tuna Myanmar in harsatna a hmachhawn mekah hian pawl anga thiam thil hmangin vehbur an khawn a, a thlawna tha sengin an sum hmuh te chu tuilian tuarte tan an hlan zel a, tlawmngai pawl te pawhin an theih ang ang an thehchhuak a, zai mi te pawhin thahnem an ngai hle a, tum khat mai duh tawk lovin hmun hran hranah concert te siamin vehbur an khawn zel bawk. Politics lamah MPCC chuan ei tur tam tham tak lirtheiin a phurh luh tir a, ZNP chuan sum pai an thawn bawk a ni.Eng pawh nise Myanmar chhunga Mizo/Zohnahthlak awm tamna hmunah puihnate hi thawn luh an ni tlangpui a; pawn lam atangin an unaute'n theih-tawp an chhuah tih an hria a, an thlamuanpui a rinawm hle. Engnge maw lian tham a thlen hian hming that emaw hlawkna umtu thenkhat chuan remchanna an hmu vat a, hmanruaa hmang hreh miah lo an awm thin a, politics ah ngat phei chuan a hluar zual a ni. Thil lawmawm deuh chu tuna chhiatnaah hian party inbeihna a awm lo a, in deu emaw tawngkam uchuak ri hriat tur a awm lo hi a lawmawm tak zet a. Engnge maw khelh lam ni lovin thinlung takin an pe niin a lang a, ‘puitu’ nih hi hlu tak a ni. Myanmar chhunga cheng Zohnahthlak unaute vek hian Mizoram in 'Buai' a tawh lai khan sahimna zawnga an mahni pantute chu theihtawp chhuahin an lo tuamhlawm tawh a, rawn let duh tawh lo, cham hlena inbengbel ta zawk an awm nawk a ni. Unau mangang aw te hriaa 'puitu' nih duhna hi a hlutna tak a ni a, tuna thil thleng hian inpawhna ril zawk thlen thei se a va duhawm em; mi thahnemngaite hmalakna atang hian ramri hi chu hmuh theihloh daidanna mai a ni a, thinlunga inpawh tlan a pawimawh zawk zia a taka lan tirtute hi an vaiin an chhuanawm tak meu meuh a ni. Kan ramri piah lama cheng kan unaute 'puitu' dinhmuna dingte hi an vannei hle a, 'puih ngai' nih ai chuan a thlanawm zawka, thawh tam hmachhuan erawh a fuh lo thei a, pe tam nih duh luatnaah midang rilru tihnat theih a ni a, inelnaah hring chhuak lo se a duhawm hle. Tunah hi chuan ti 'tha bik' anga inngaihna awmin a lang lo a, a pe tamte sawi pawr tum talhna thawm riva a awm lo bawk a, ‘puitu’ nih duhna rilru in hma an lak vang a ni a, a lawmawm hle mai. Pek tlem leh tam lam chu thuhran nise, 'puitu' rilru pua hmalatute hian party, pawl emaw mimal a ni emaw inhlut thiampui ila, in fak tawn sak bawk ila duhthusam a ni a, helai tualchhungah pawh thil tha zawk a nghawng chhuah ngei a rinawm a, a tha lai hmu tam apiangin chhungril rilruah lawmna an nei bawk ang a, a thlawna insengso anga inngai lovin a hlawkna teltu a nih tel theih a, rilru zau zawk put hun lai a ni e.