ZALEN November 4, 2025: MNF President Zoramthanga chuan Thorang bial, Lungsen Chhimveng YMA hall-ah vawiin khan political training leh mithar lawmluhna hunah khuallian niin a hmanpui a, thusawiin, "Hnam thinlungpu thalaiten ZPM sawrkar hi an kham tawh. Pathianin Zoram hi a hmangaih a, hun khirh tak karah pawh a hruaichhuak thin. Pathian remruat vangin MNF kan tla a, ZPM an sawrkar a, enchhin sawrkar mai an ni," a ti. 

MNF President chuan, "Saiip puan sina bultan chu zu khapna dan ennawnna in a zui a. Contract hna inpeknaah nasa takin pawi an khawih a. Ram an hralh a, kan rohlu tihral an an tum zel bawk a. Dawt an sawi zozaite hi sawisen a nilo a, dawt sawiah pawh hian a chintawk a awm asin mawle, tih hial tur an ni," a ti. 

Zoramthanga chuan, "ZPM sawrkar pawikhawih zozaite hi MNF sawrkar leh hunah siamthat leh a ni ang a, nuaibo vek a ni ang. Opposition party atangin ruling party ah mi an lut thin a ni a. Tunah erawh chuan, ruling atangin opposition MNF-ah hmun hrang hrang atangin an rawn lut zel a. MNF in thuneihna a neih leh thuai dawn vang a ni a. Pathianin tum neiin MNF a hruai thin a, kawng laklawhah min tawpsan lovang," tiin.

"Hmuntinah kawng a chhia a, kawng siamthatna tur chhiah an la chung pawhin kawng siamthat a ni chuang lo. Aizawl khawpui mamawh khawp pawh tui pump theilo te hian, tuikhuaha tui pump an tum thute an sawi a. Hmun tinah enchhin fuh lohna thawm a ri ring hle. Chuvangin, ZPM tan tlin theina bial a vang hle ang, MNF tlinpui kum kan thleng leh mai dawn a, theihtawp i chhuah zel ang u," tiin party mipui kalkhawmte a fuih bawk. 

He hunah hian voters, ZPM party atangin 121, Congress party atangin 75, BJP atangin 28 leh neutral 16 MNF party ah lawmluh an ni.