ZALEN September 1, 2025 : Vawiin khan Mizo Hnam Run, Lunglei-ah MNF Party chhung inkhawm hman a ni a. Political session MNF Sub Hqrs Lunglei Vice President Chawngthanmawia chuan thu sawiin MNF thawhchhuah leh dan tur, Mizoram a political party zinga MNF danglam bikna te party mipui kalkhawmte hmaah a sawi. 

Chawngthana chuan, "MNF nilo Congress nilo, mipui sawrkar kalphung thar min tiamtute hi Financial management ah an hlawhchham zia hretu leh tawngtute chu Zoram mipuite hi kan ni. Lalruanga chawfun ang mai in a ngai leh a ngai hlir an phawrh a. Hmasawnna hmuh tur a awm lo. An rorelna hnuaiah nitin mai, mi beidawng an pung telh telh a. Hei hian Mizo thalaite-ah thil tha lo zawk a nghawng ang tih a hlauhawm hle mai."

"Politician hmasate kalphung duh khawp lohna avanga kan ram a, Third Front lian tak lo ding, Sawrkarna mipuiin kan pek chu, mipui beisei ang leh lo thlir dan ang an ni lo hle si a nih hi! Mahse, beidawng lo ila, Pathian in ram min pe a, Hnamah min din a, Isua Krista Chanchin tha min pe a, kan ban phak leh kan tlin tawk ang zelin ram inrelbawl danah min hruai thin tih kan hriat thar a tha hle ani. Mizote hi Khawvel a, Chanchin Tha hril tura a ruat te kan ni a, ringlo mite hmasawn dan emaw, inrelbawl dan emaw entawn a kal ve ngawt turin Pathian in min ti lo a, amah chu Lalbera kan neih a, Hnam, Sakhua leh Ram humhima, a rawngbawl turin min duh a ni tih hi i hre thar leh ang u" a ti.

MNF Sub Headquarter Vice President chuan, "Mizoram Political Party zingah hian MNF hi kan danglam bik a! Kan that bik vang, kan fel bik vang niloin Pathian in hnam thuthlung a lut turin Pu Laldenga leh Hnam Sipaite hmangin a lo ruat lawk kha. Kha Nationalism movement-ah khan Mizo zawng zawngin a man kan pe pawh kan ti thei ang, MNF te hian kan duh ang leh tum ram la thleng pha rih lo mahila, Mizo te erawh Nationalism movement hmangin khawvel hriat a pho chhuah kan lo nih phah ta."

"Zofa ten Politics kalkawng kan zawh chhohna-ah, ram hnam leh sakhua himna tur atan, chimral kan nih mai lohna atan, kan hnam nihphung kan bosal loh nan, Pathian Lal ram a lo zau zelna atan, MNF hi Hnam thuthlung hmangin Pathianin min thawhtir leh dawn a, lang lo liamah kan in buatsaih mup mup a ni tih Zoram mipui hriatah kan sawi nawn leh duh a ni," a ti bawk.