Aizawl; Joint Action Committee ( JAC), Mizoram Pick-Up Owner's & Driver's Association in March ni 1, 2023 atanga hnamdang pick up khalh an khap chuan zawm a hlawh tha hle a. Hetihlai hian Mizo hming hawh a lirthei (pick up) register, hnamdang ta ni si a tam nia thudawn a ni.

JAC Pick-Up Owner's & Driver's Association hruaitute hnen atanga ZALEN thudawn danin, Aizawl leh district khawpui dangah eizawnna atana pick up khalh hnamdang an tam hle a, a zat chiah erawh hriat a har, "Hnamdang dawr ten an nei deuh vek a, bungraw sem bakah town trip te an la a, town trip hial min chuhpui takah chuan hma kan la ta chauh zawk a ni," an ti.

Hnamdang ten Mizo hming an hawh nasa nia a lan thu JAC hruaitute chuan sawi bawkin, "Sum chhete kan hmuh chuan Mizote hi kan lo thilphal khawp a, Mizo hming hawhin an lei zung zung mai niin a lang," an ti a, tuna an hmalakna chu district khawpui hrang hrang ten an zawm zel niin an sawi. 

JAC hruaitute sawi danin, March ni 9, 2023 khan Muslim Welfare, City area ten JAC hruaitute bia in, an dawr bungrua chauh deliver phalsak turin an ngen a, chu chu joint meeting in an ngaihtuah hnuah, phalsak an ni lo.

JAC chuan, Central YMA in ram leh hnam humhalh kuma a lo puan angin, ram leh hnam, khawltlang leh chhungkaw him tlan nan, Mizo driver ngeiin Mizoram chhungah pick up khalh a bungraw phurh an duh tih thuchhuah siamin an tarlang a. An hmalakna chuan inter-state, corporation, sawrkar leh company hnathawk te a huam lo tih an tarlang. 

"Kan ngenna min zawm tha hle a, kan lawm tak zet a, chutih rualin kan ngenna zawm tha duh lo mi tlem te, vai driver chhawr lui kan la awm a, kut palh an lo tuar a nih pawhin mawh kan phur lo vang," an ti.