October 8, 2023; A bikin Aizawl khawpui chhung a sumdawnna peng hrang hrangah hnamdang (vai) ten bu an khuar nghet mek zel niin a lang. Mizo sumdawngte tan dawr luah tur hmuh mai pawh a harsa tawh a, Mizo hming hawh a sumdawnna kalpui pawh an tam hle nia hriat a ni.

ZALEN thudawn danin, Aizawl khawpui chhungah in sa thar, dawr hmun remchang luah tur a awmin, hnamdang sumdawngten an chuh chak thin hle a, an luah theihna tur a nih chuan a neitute chhiar aia sang pawh a an luah ngam thin avangin, Mizo sumdawngte tan chan a har thin a, hemi kawngah hian hnamdang sumdawng ten tunlai hian tan an la nasa zual nia hriat a ni.

Rod leh cement lama sumdawnna ah phei chuan, tun dinhmun a Aizawl a dawr awm zawng zawng zinga za a 80 vel chu hnamdang dawr a ni hial tawh nia sawi a ni.

"Mizo hming hawh a hnamdang sumdawng hi sumdawnna peng hrang hrangah an tam niin a lang a, Mizote tun atangin kan tanrual a ngai khawp mai, a nih loh chuan chimralin kan la awm dawn," tiin sumdawng thenkhatte chuan ZALEN an hrilh.