Aizawl: Mizoram chuan Asian Development Bank (ADB) loan hmanga Aizawl khawpui chei thatna tur sum a dawn chu a hman that avangin a tira sum hmuh tur ruahman vaibelchhe 330 chu vaibelchhe 690.27-ah tihpun a ni. Nimin khan Aizawl Press Club-ah chanchinbumite kawma he thu hi sawiin UD&PA Minister Zodintluanga chuan hmarchhak khawpui 5- Agartala (Tripura), Aizawl, Gangtok (Sikkim), Kohima (Nagaland) leh Shillong (Maghalaya) te tui in tur hnianghnar pekna, bawlhhlawh leh thli sawngbawlna atana ADB in vaibelchhe 1390 a puk tirah Mizoram chuan tha taka hna a thawh avang leh khawpui 3 Shillong, Kohima leh Gangtok ten an thawh that loh avangin khawpui danga sum hman tura ruahman tawh chu Aizawl khawpui tan hian pek belhchhah a ni tih a sawi a. Mizoram sum hmuh hi hmarchhak bial sum hmuh atanga tehin 49.65% a tling tih a sawi. Minister chuan ADB sum hmang hian Aizawl khawpui chhuah-lam veng 21 te thli chu lakhawmin felfai taka sawngbawl tum mek a ni tih a sawi a. “Tui in tur hnianghnar a awm theihnan Tlawng lui hi Setlak lui chhuah ah pump turin ruahmanna kan siam mek a. Ruahman dan chuan ni khatah 37mld pump theih kan beisei a, hei hi a puitlin hun chuan ni khatah darkar 24 tui kan haw thei dawn a ni,” a ti. Tui pipe thalo lai te siam that mek a ni tih sawiin, “Vaivakawn tanky tihkhah nana darkar 36 ngai thin pawh darkar 3 chhungin tihkhah theih a ni tawh a. Pipe thar phum kan zawh hun chuan kan kawtkai atangin connection kan la thei tawh dawn a ni,” a ti bawk.