ZALEN January 17, 2025 : Aizawl South II ZPM chuan vawiin khan R Dengthuama Hall, Mualpuiah Block Conference an nei a, he hun hmanpuitu Chief Minister Lalduhoma chuan party leh sawrkar timualpho khawpa hnathawk chhia an awm anih chuan party atang pawhin an inchawlhtir hreh loh tur thu a sawi.

Khuallian Chief Minister chuan,"Party leh sawrkar ti mualpho khawpa hnathawk chhia, ram hmangaihna nei lo, hlep hnem tum ringawt kan awm a nih chuan party atang pawhin kan inchawlh tir hreh dawn lo a ni. Sawrkar hmasa atanga kan chhawm, hna chhia leh tlo lo tak tak buaipui ngai a awm teuh mai a, ZPM sawrkar hnua thawh chu a tha bik tur a ni a, a danglam tur a ni," a ti.

Lalduhoma chuan, "Kan sawrkar tirh khan, 'Thlai thar kan buaipui ang,' kan ti a. Nikumah Hmunphiah bikah agreement kan ziahpui company in min ti mualpho hle mai a, kuminah erawh empanelled firm 7 te nen agreement kan ziak a, Hmunphiah ro hi an lei zo vek thei lo a nih chuan sawrkarin a lei ang a, Home hrang hranga awm thalaite hnathawh tur kan siam sak dawn a ni," a ti.

Chief Minister chuan, "Kan sawrkar tuk atangin beih kan tawk nghal a, thil tha kan tih te hmu thei lovin sawi selna tur an zawng nasa hle. 'In Sawhthing lei kan ba lo,' ti tute ngeiin Kuthnathawktute kan han ngaihsak chu min beihna an zawng leh si a, thil tha kan ti ang tih hi an hlau em em a, mahse kan ram tan hian thil tha tih kan thulh dawn chuang lova, kuthnathawktute an banah kaiin kan khai chhuak ngei dawn a ni."

"Tun dinhmunah Sawhthing pawh a chawh hun runpui kan la thleng lova, kuthnathawktute hmakhaw ngaiin a to hun kan nghahpui hret a, kan lo sawi tawh chu tihhlawhtlin ngei kan tum a ni. A him chin leh a mawi chinah te chuan party mi te kan inhre ve ang, amaherawh chu mimal hamthatna duh lutuk avanga innawr vak vak te hi a tha lova, ZPM in ram siam kan tum dan nen pawh a inpersan hle a ni. ZPM chu kan danglam tur a ni kan tih kha a la ngai reng a ni," a ti.