Aizawl: MNF Senior Vice President Tawnluia chuan, “MNF sawrkar veleh Khawzawl District Headquarter hi hnathawk theiin kan siam nghal dawn a ni,” a ti. Nimina Khawzawl Sports Festival kharna inkhawm, Mualvawm Field-ah neihah he thu hi sawiin Tawnluia chuan, “Pathian leh mipui zara kan sawrkar chuan thalaiten mahni talent theuh hmanga eizawnna an kalpui theihna tur lam hawiin hma kan la dawn a. Thalai ruihhlo leh zuin an sawisak mekte chhanchhuak turin theihtawpin hma kan la dawn a ni,” a ti a. “Zoram Thalai zingah zu leh ruihhloin a tihbuai loh, infiammi talent tha, taima leh insum thei thahnem tak an awm tih kan hria a. Kan sawrkar hunah heng mite tan hian nasa takin hma thar kan la dawn a. An thiamna leh theihnate eizawnna tlaka an hman theih nan an talent tihpun sak kan tum a ni,” a ti bawk. Tawnluia hian Khawzawl Sports Festival-a inelna chi hrang hrang 7-a lawmman bakah, Khawzawl atanga infiammi mi hmingtha 3-te hnena chawimawina, Khawzawl Sports Committee-in buatsaih chu a sem nghal bawk a ni.