ZALEN December 16, 2024; Falkland khawtlang chuan December ni 14, 2024 Inrinni khan an veng chhung kawng (world bank road) lei tlahniam hnatlang in an siam.

Falkland Local Council huaihawtin Falkland (Aizawl) khawtlang chuan, cyclone Remal avanga an veng chhung kawng, state highway ni bawk, chhim lam mamawh chawk luhna ber chu, kawng zat ve zetin a tla hniam a; he lai hi falkland Local Council leh all NGO-te, DC leh PWD hotute nen vawi tam en leh sawikhawm ni tawh mahse, siamthat leh hmalakna a la awm loh avangin, khawtlang hruaitu leh mipui ten hnatlanga siam mai an rel ta a ni.

He lai kawng hi, tun hnai khan a chhe zual nasa hle a, two wheeler-a chetsualna a nasa in, truck-te pawh a leh mai hlauhawm khawp a a awm tak avangin, khawtlang mipui te sum thawhkhawm hmangin, he hnatlang hi neih a ni ta a ni. 

Falkland khawtlang chuan an veng chhung kawng an siam chungchangah te, chhiatna nasa zawk leh nunna hial te chan palh theih a nih avangin, mipui nunphung an tih khaih lakna ah mipuite hriatthiamna an ngen.