Aizawl: MNF Vice President Dr. R.Lalthangliana chuan, "Tun ang reng renga MLA inthlan hma thlahnih /thum chhunga ruling party-ten sawrkar leh an inrin tawh loh hi kan ramah a la awm ngai lo a. MNF tan sawrkar loh hlauhna tur chhan a awm lo a, kan hmaa MLA inthlan lo awm turah hian hneh takin sawrkar kan siam ngei dawn a ni," a ti. Nimina Lunglei North block I, Lunglei West block I leh Lunglei East block I & II-ten Political Training & Worker's Meet an neih a hmanpuina ah he thu hi sawiin Dr. R.Lalthangliana chuan, "Kan kawngpui chhiatzia te hi a lungchhiatthlak a, a bikin Congress sawrkar hian chhim lam hi min ngaihthah hle a. MNF kan sawrkar hunah kawngpui chhiate hi kan siamtha vek dawn a ni," a ti. Dr.R.Lalthangliana chuan, "Southern District zawng zawng enkawl turin Commissioner kan sawrkar hunah kan dah thar dawn a, a thu chauha Congress-in a din MZU Southern Campus hi kan sawrkar veleh a tak takin Lungleiah kan dah ang," a ti bawk.