Aizawl; North Vanlaiphai thalai, hlimna thlarau in a khawih vanga hnute hne te chu thanglianin tunlai hian sualna an phur leh mek. North Vanlaiphai Damdawi in veng Upa C.Lalthlamuana hnen atanga Zalen thudawn danin thalaite hi ruihtheih thil an ti lo chungin rui angin an awm a, midang daih angah changin an hming, pa hming, hnathawh leh an thilsual tih an sawi thei vek a. Ninga zan atang khan Setanic ah chang telin Berawtlang ah te an inkhawm thin niin an sawi, a ti a. Heng mite hi kohhran chuan a tul anga buapuiin an ei tur leh mamawhte an pe thin niin a sawi a, nimin Inrinni ah pawh a tum 4 na atan Pathian chawimawina an nei tih a sawi bawk. Upa C.Lalthlamuana chuan thalaite rawngbawlna avangin mi engemaw zatin taksa damna an chang nia sawiin tunah erawh chuan damna lam/taksa khawih chu an kalsan hrih a. Pathianin a pek hunah tihdam rawngbawlna chu an kalpui leh dawn niin a sawi. North Vanlaiphai thilthleng hian Zoram mipui ngaihven a hlawh hle a, hmun hrang hrang atangin pantu mi engemaw zat an awm a. Chanchinbumi pawh engemaw zat a hmuna thil awmdan enfiah hian an kal bawk. Synod lam pawhin zirchiang tur ni lemlo, thla la turin Nilaini khan N. Vanlaiphai ah hian an kal niin thu kan dawng.