Hnutiang leh Hmatiang

• Lalhruaitluanga Chawngte
• 
  Puan a bih a, thlasik lai a nih avangin kawrlum chungah shawl a bat; ipte a ak bawk - ipte chei. Chu thlasik khaw vawt vin var mai hnuaiah chuan hmanhmawh takin a pen hlawk hlawk a, um a nei emaw han tih mai theih tur khawpin a ni a hmanhmawh ni.
  
• A inthuamna leh infam dan a\ang chuan, Mizonu, zan tira chutianga incheia chhuak chuan biak in lam a pan a ni ang tih a rin theih mai a, inkhawm zan a nih loh avangin, tin, Krismas thlen in neih ngai tawh lohna hmun Aizawl a ni bawk nen, Krismas dawna chutianga inthuam chunga biak in pantu chu a zaikhawm dawn a ni ang tih pawh a rin mai theih.
  
• "Kei chu ka zai peih lo… Krismas hla hi ka ning, ka sa peih lo," a ti hmuar hmuar a, a bul vela mite'n an zawt hran lo chungin Krismas hla sak a peih loh thu chu hmanhmawh taka kal chung chuan a hrilh phei mawlh mawlh hlawm. Krismas hla sa peih love ti lovin hmanhmawh takin a thleng hmasate Krismas hla saa an lo zai thup thupna hmun chu a pan lawi.
  
• Zai peih lo te chu zaikhawm loh mai awm! Krismas hla sa peih lo te chu kir leh daih mai awm! A kir lo a, phur takin a kal a nih zawk kha!
  
• A pasal a sun tawh a, chu chu a ni thil awmzia chu.
  
• Mi dang pawh chutiang chu kan ni fur ang; lusun tawh vang ni kher lo pawhin chutiang chu kan ni hlawm ang - a um phakte leh a kal pelhte pawh kha. Amah Patea’n, “Lal pian hun pangpar a vul leh ta, thinlai mu hnu lunglen a kaitho e,” a lo tih kha Zofate nihna dik tak a ni.
  
• Zofate tan chuan thlasik laia parte hi “Lal pian hun pangpar” a ni bik tlat a, “Lal pian hun pangpar” a vul tawh chuan thinlai mu hnu pawh a lo tho thin.
  
• “Kum chanve kan lo chuangkai leh ta reng mai…,” kan tih hnu lawkah September thla a lo her chhuak a, “Ekhai! ‘Ber’ thla kan lo thleng leh ta reng mai,” tih chu tawngkam tualleng a tling nghal - engtin emaw tak kan danglam tan. Engemaw lai phei kha chuan ni tin chhuak chanchinbute hian ‘news in brief’ (news tawi huang) chung berah, “Kan ti nek nek a, ‘ber’ thla kan lo thleng leh ta reng mai,” tih an ziak kher thin. Ziak leh chhiar thiam lote pawhina an hriat sa ni mah se ‘news’ a tling tihna a ni ang. Chutah October a lo thleng a, kum tawp a hnai tawh tih chu calendar ni lo thil dang zawkin min hrilh tawh. November-ah phei chuan, ‘Chawlhni chuti zat a la awm,’ kan ti rilru sup sup tawh thin. December thla kan chuankai meuh phei chuan, hnam dang kan ni te a nih ngawt loh chuan, min mantu a awm a, min thamtu nen - sawifiah thiam theih lohvin engtin emaw tak kan awm tlat zel.
  
• Kan hma lawkah Krismas a awm tih hriain kan phur a, hma lam thlir e ti lovin hnung lam kan hawilet tlat lawi!
  
• Chutiang hunah chuan hliam hlui a lo pun thar leh a, a nih loh leh pan a lo pem tha leh thul! Chuti chungin kan hma lawka hun pui lo thleng tur chuan min pawt bawk si. Rit an tih em avanga zan muhil thei lo an awm a, a thenin khawvel hi an lo muthilhsan phal lo thung. Kan hnung lam vanga lungleng nge kan niha kan hma lamin lung min len zawk tih pawh sawi thiam theih a ni lo. Hmasang Rome pathian Janus-a, a hma lam leh a tukkhum lama mit a neih vanga hma lam leh hnung lam a ruala hmu kawp thei ang mai kha kan ni a, ani ai khan kan thlir kawp nasa zawk hial mai thei nghe nghe e a!
  
• Keimahniah thil inep tak tak a lo thleng rual a, chutiang thil inkawlkalh leh inkawkalh, inkawlkalh kawkalh tak tak a ruala mihringa a’n awm chuan danglam loh theih a ni lo.
  
• Kan lunglentu hun kal tain min uai a, tih fuh loh tum phei chuan a vihin min vit thin. Chutih rualin kan nghahhlelh kan hma lama miin min pawt bawk si. Lunglen leh nghahhlelh a ruala a awma, hnutiang leh hmatiang an han intawh meuh chuan mihring tan awm mai mai theih a ni lo.
  
• Chutiang hunah chuan tingtang hrui kim lo ri mai mai pawhin rilru a khawih ta tlat a, ral lehlama tute emaw zai vau vau ri te pawh a fiah tlat zel. Khaw vawh vang chauh ni lovin ni êng te pawh a mawi lehzual lo thei lo.
  
• Chutiang hunah chuan pangpar a lo mawi zual a, kawng chhak lama nihawi par lo par eng tuarte leh kawng sira tlangsam par lo par paw pheute chu an par a ni satliah lo - inthlahrun hmel taka tlaizawng par lo vul te pawh - thu ken an nei. Zofate tan chuan “Lal pian hun pangpar”-in ngawi rengin thu a sawi a, chu a thusawi chu inhrilh chhawng leh kher lo pawhin, mitmeng atang ringawt pawhin kan inhriatthiamsak thlap zel.
  
• Chutiang hunah chuan naupang nui ri a lo mawi zual a, nutling mittui pawhin rilru a khawih zual thin. Chutiang hunah chuan patling pawhin awm hle hle har an ti a, zaikhawm lai te hian an pharchhuah em loh pawhin an insawi hlah hlah fo asin! Pu C Lalkhawliana’n:
  “Kumsul liam hnu kan nun ngaihlai tho leh thin,Rem lal pian hun champha hmatiangah kan thlir,” a tih khan kan awm dan a hril fiah ber awm e; “kumsul liam hnu” leh “hmatiang” an intawk tlat a ni!
  Hetiang hi kan ni reng kher lo mai thei a, chutianga hetiang kan ni ta lo te a nih ngai chuan hetiang kan nih laia kan thinlung khawihtu thilte hi hnawlin, a zah te pawh kan la zahpui hial mai thei. Vaihovin a awmze hre miah lova Krismas an hre ve em em, sumdawnna hun remchanga an lo ngai teh daih te ang leh saphovin huau huau emaw tia intihhlim ringawt an ngaihtuah tlat ang te hian, lunglenna tel lo leh nghahhlelh pawh nei chuang lovin, nui bawk bawk chungin hetiang hunah hian kan la inpel suau suau mahna. Chutiang huna thang liante chu ka khawngaih lawk mange!