12th Hockey India Sub-Junior Women National Championship 2022 chu May ni 11, 2022 tlai atangin Hockey Stadium, Khuman Lampak, Manipur-ah tan a ni dawn. He championship-ah hian State leh Union Territory atangin team 25 an inlan ang. Mizoram aiawh tleirawl rual te chuan a thlengtu State Manipur an thleng tawh a, naktuk May ni 12 hian an match hmasa berah Bihar an hmachhawn ang.   

Nimin thleng khan team 18, Kerala, Tamil Nadu, Bihar, Assam, Punjab, Jharkhand, Arunachal Pradesh, Bengal, Tripura, Haryana, Odisha, Uttar Pradesh, Mizoram, Maharashtra, Chandigarh, Gujarat, Telangana leh Manipur ten intihsiakna hmun tur hi an thleng tawh a, team dang erawh fixture milin an khelh dawn hnaiah an kal thung ang.

He championship hi Manipur Chief Minister N Biren Singh, Manipur Hockey patron-in chief-in khuhhawnna hun chawhnu dar 3:00-ah a hmang ang a, championship opening match hi a thlengtu state Manipur Hockey leh Kerala Hockey ten tlai 5:30-ah match hmasa ber an khel ang. Nimin khan Hockey India, president Gyanendra Ningombam-a hovin managers’ meeting neiin championship dan leh dun bakah hlawhtling tak an buatsaih theih dan tur an sawi ho. 

May ni 11 atanga May ni 22 awh tur championship-a tel tur team 25 te hi pool 8-ah then niin pool H tih loh zawng chu pool khatah team pathum zel an awm. Pool inthen dan chu hetiang hi a ni.

Pool A
Haryana, Bengal leh Jammu & Kashmir

Pool B
Jharkhand, Manipur leh Kerala

Pool C
Uttar Pradesh, Chhattisgarh leh Gujarat

Pool D 
Odisha, Madhya Pradesh leh Uttarakhand.

Pool E
Delhi, Maharashtra leh Assam 

Pool F
Tamil Nadu, Chandigarh leh Arunachal Pradesh

Pool G
Punjab, Tripura leh Himachal 

Pool H
Bihar, Karnataka, Mizoram leh Telangana

Pool match hi ni sarih chhung an khelh hnuah, May ni 19 atangin quarter-final an khel ang. May ni 21-ah semi-final khel lehin champion tur zawnna hi May ni 22 an neih a ni ang.