Sports Minister Lalnghinglova (Tetea) Hmar chuan hockey chu an ngaih pawimawh zinga mi a ni dawn tih a sawi.

Tetea hi Zirtawpnia Physical Education Foundation of India (PEFI) leh Sport India Foundation bultuma Pragati Maidan, New Delhi-ah Sport India Conference, 2024-ah khual lian a ni a. Sawihonaah a buatsaihtute ngenna angin panel discussion-ah a tel bawk.

Sawihonaah hian moderator zawhna chhangin Tetea chuan hockey chungchang hi a sawi a, “Mizoramah a chawinung leh turin hma lak mek a ni,” a ti.

“Hockey chu hman atanga India thatna, khawvel mit hmuha India phochhuaktu a ni a, hockey hi kan ngaih pawimawh zinga mi a ni dawn,” a ti.

Mizoram chu hmeichhe hockey-ah hma a sawn laiin mipa lamah tan lak a la ngai tih sawiin, “Theihtawp kan chhuah dawn,” a ti.

Sports minister-in a sawi ang hian tun hnaiah Mizoramah hmeichhe hockey player tha tak tak an chhuak a. 2016 Rio Olympic Games-ah khan H.Lalruatfeli chu India reserve team-ah telin 2016 South Asian Games-ah India team-ah a tel bawk.

A hnuah Lalremsiami Hmar Zote chu 2018 Youth Olympic Games atanga inlan tanin Asian Games leh 2020 Tokyo Olympic Games thlengin India tan a inlan phak a. Tunah pawh India team-ah thawhhlawk ber pakhat a la ni.

May thlaa Europe fanga India junior team zin chhuakah Mizo tleirawl pahnih - Lalthantluangi, Kanghmun leh Lalrinpuii, Hnahthial te an tel.

Mizo hmeichhia hockey player dangte pawh inzir mek leh India team atana trial pha an awm nual bawk.

Tun hnai khan Aizawl District Hockey Association (ADHA) chuan hockey thehlar leh tihhlut nan LPS Arena-ah Zoliana Royte Memorial Hockey 5’s Indoor Tournament a lo buatsaih tawh bawk.

Sport India Conference-a sawihonaah hian Tetea chuan Mizorama sports tihhmasawn nana hma lakna tur sawiin khua zawng zawng hrutchhuaka coaching project lian tham kalpui tum a nih thu a sawi a, hei hi theihna nei thate zawnchhuahna pawimawh tak a nih nghal tur thu a sawi bawk.