August 5, 2023-a chhuak tur Sportstar chanchinbu chuan Mizoram atanga Asian Games-a medal awrh pha hmasa ber, Lalremsiami Hmarzote leh hockey a khelhpui mi pathum kawmna a tichhuak dawn a. ZALEN chhiartute tan kan rawn chhawp chhuak e.

Kum 23 mi, Siami leh a thiante hi June 23-a Olympic Day puala Sportstar Podcast-a an kawmna kha a ni tawh a, chanchinbu lamah erawh kar leh Inrinniah an tichhuak chauh ang.

Forward Siami rual hian Indian mipa hockey team captain leh dragflicker Harmanpreet Singh leh hmeichhe team captain leh goalkeeper Savita Pania te kawm an ni a. Olympic Day puala inkawmna a nih angin Tokyo 2020 Olympic Games-a an inlana an tawnhriat behchhana an kawmna a ni ber.

Nangmaha Olympic-in a ken tel thatna, inthian thatna leh inzahna hlutnain nghawng a neih dan...
Siami: Keimaha a huhova khelh chi (team sport)-a tel ve a thatna ber chu engtik lai mahin kan chhungte atanga hla takah kan awm ngai lo anga inngaihna a awm tlat hi a ni a. A tute pawh hian thil kan zira hma kan sawnho vek a ni.

Olympic-a i inlan hmasak ber leh i tawnhriata i duh ber lai...
Siami: Junior player ka nih laia ka suangtuah thin chu senior level-a ram tana inlan leh Olympics-a khelh phak a ni a. Ni e, ka nervous nasa tak zet a; mahse, vawiin ka sawi chhuah duh chu team-a senior zawkten naupang zawkte min kaihhruai dan kha a ni a. Ka tawnhriat ka a ropui a, thil thar tam tak kan zir a ni. Pressure nasa tak chu a awm ngei a; mahse, kan coaching staff-te khan tha taka hmachhawn thei turin min pui a ni.

Sjoerd Marijne-a’n hmeichhe hockey-a harh tharna a rawn thlen leh a dawta Schopman-i’n a kalpui zel chungchangah hian...
Siami: Kan zavaiin Jan-i hi coach fing tak a ni tih kan hre theuh va. Player tu pawh an thatna lai bik a hria a, hma an sawn theihna lai tur pawh a hre zel a. Keima mi malah chuan hma ka sawnpui nasa a, match awareness pawh ka neih that phah a. Khelmual chhung leh pawnah pawh min fuihtu a ni a. Kan dik emaw, dik lo emaw, ani chuan min fuih thin.

(Marijne-a hi Dutch player hlui niin Indian national team hi kum 2018 leh 2021 inkar khan a enkawl a, Tokyo-a hruaitu pawh a ni a. Janneke Schopman-i hian a thlak a, tunah Siami te hi a enkawl ve mek a, ani pawh hi Dutch player hlui tho a ni).

Tokyo 2020 hnua thil kalpui leh rilru puthmang inthlak dan...
Siami: Olympics hnu atang kha chuan hockey hi a lar sawt a. A bikin keimahah chuan Mizoramah hockey khel ngai an awm lo va, Tokyo atanga ka haw hnuah erawh hmelhriat ka hlawh a. Olympics hnuah khan kan sorkar pawhin naupang zawkten an khelh theih nan hockey ground sak an tum a. Sjoerd sir pawhin Twitter-ah a tar lang a, kha kha Olympic hian Mizoramah rah tha tak neiin naupangten stick an lek chhuah phah a. Kan state-a thil buaithlak ber chu hockey ground leh a ken tel thil kan nei tha lo va; mahse, kan sorkarin hockey kan khelh theihna turin ngaihtuahna a seng tawh a ni.

Team sport-in mi mala thila harsatna tawn pawha a puih dan...
Siami: Team sport-ah hian tel lo ila chuan hun khirh tak tak ka tawn hi ka paltlang zo ngai lo vang. Engtik lai pawhin ka kiangah team an awm a. Team-a ka tel tirh hian Hindi ka thiam lo va, sap tawng pawh ka thiam lo va, Mizo chauh ka thiam a. Ka khelhpuiten Hindi leh English an thiam a, Mizo an thiam ve leh si lo. Mahse, player senior zawkten min puiin min kaihruai  zel a. Zawi zawiin ka inzir zel a ni. Olympics khel tura kan tlin vel bawr khan ka pain min kalsan a, kha ka hun thim takaha pawh khan ka khelhpui leh coaching staff-ten min awmpui a, ka paltlang thei chauh a ni. Hockey ka khel hi kei chu vannei ka inti tak zet a ni.

Siami hnuhma
Kolasib-a lo neitu chhungkua atanga sei lian, Siami hi Sportstar-in an kawm chhan ber chu Tolyo Olympic-a a inlan avang a ni a. Mizoram atanga hmeichhe zinga Olympic Games-a inlan thei hmasa ber a ni.

Tokyo-ah hian medal dawng pha lo chiahin palina ni mah se India hmeichhe team thlen san ber tum a ni tho va, FIH World Rankings-ah pawh an tawn san lai ber tawnpuiin No. 8 a kaipui a ni.

Halfback-ah pawh khel thei, Siami hi 2022 Junior World Cup-ah khan India national under-21 team captain atan ruah hman a ni hial a; mahse, a tak takah erawh Salima Tete chuan a kaihruai ta zawk a, hemi tum hian palina bawk an ni.

Asia Cup 2022-ah khan bronze medal lain goal hnih a thun nghe nghe a. Hemi tum hian a khelhna pangngai, forward atangin midfield-ah sawn hnun a ni zawk nghe nghe a. Asia Cup-ah hian kum 2017 khan a vawi hnih nana India an champion tumin a tel tawh bawk.

Siami hian Asian Games 2018 Jakarta-ah khan silver medal awrh bawkin Mizo infiam mi zinga Asiad-a medal dawng pha hmasa ber a ni a. Commonwealth Games 2022 Birmingham-ah khan bronze dawngin Asian Champions Trophy 2018 Donghae-ah silver medal leh Youth Olympic Games 2018 Buenos Aires-ah silver medal a dawng tawh bawk.