ZALEN Sept. 18, 2024; Lalthianghlimi, Ramhlun North chuan a kutin Holy Bible vawi 11 a ziak chhuak tawh. Khawvel huap pawha Bible ziak chhuak ngun ber a ni thei hial mai ang em?

Bible a ziah chhuah hmasak ber chuan ni 422 a ziak a, a bu hnihna chu ni 299 chhung ziakin, a bu thumna chu ni 384, a bu li-na ni 335, a bu ngana ni 254 leh a bu rukna chu ni 165 chhungin a ziak zo hman. A bu sarihna-ah ni 206 hmangin, a bu riatna-ah ni 194, bu kuana-ah ni 256, bu 10 na-ah ni 193 leh bu 11 na-ah ni 189 ziah nan a hmang.

Bible ziah nan hian ball pen 701 zet a hmang tawh a ni.

ZALEN zawhna chhanga a sawi danin, Mathiangi hian July ni 7, 2015 khan Bible ziah chhuah tumin bul a tan a, chutih lai chuan nau hnute hne lai a pawm nghe nghe a. August 7, 2024 khan a vawi 11 nan Holy Bible hi a ziak chhuak a ni.

Bible a ziah thin chungchangah mumal takin hunbi a in siam thin a, a ziah hun tam ber chu zing dar 2/3 atanga zing dar 5 inkarah niin, hun a in siam dan a zir zelin hun dangah pawh a ziak thin.

A pasalin kum 2018 khan a lo boral san tawha, a fate enkawl chungin hun a in siama, Holy Bible vawi 1 tal ziah chhuah leh a tum a, Bible Society of India (BSI) hruaitute pawhin vawi 12 tal ziak chhuak turin thurawn an pe a, chumi tur chuan a inbuatsaih chho leh mek bawk.

"Bible ka ziah chhuahah hlawkna tam tak ka chhar a, sawi vek sen pawh a ni lo ang, harsatna kan tawhin, kan thinlungah zawite, fiah tak siin tlanchhuahna kawng Pathianin min rawn pe thin a, chu chu Pathian aw a ni tih ka chiang, ka hun tawn a zira chawp leh chilh a hman nghal tur thinlunga rawn awm mai ang chi te pawh sawi tur tam tak a awm..." tiin Mathiangi chuan ZALEN a hrilh.

Kum 10 chhunga Holy Bible vawi 11 ziak chhuak thei Mathiangi hi Mizo zingah chuan Bible ziak chhuak hnem ber a nih ngei a rinawm a, khawvel huapah pawh ani aia ziak chhuak hnem hi an awm kher ang em? An awm a nih pawhin tam an awm a rinawm loh.