Tun lai chu House of Madness (H.O.M) te boruak a lian a, an hawina lamah Mizo mipui an thle dual dual zel a ni ber. An music video thar 'Di enchim loh' pawh ni 10 ral hmain mi maktaduai khat chuangin an en der mai. 

H.O.M hian kum hlui thla ni December 31 khan 'Di enchim loh' official music video hi an tichhuak a, hunpui lai ni mah se 'Di enchim loh ka liam ta’ng e, Ai ang chamin, ?ah khua sei mah se. Run dang mawi tur zawng chhai bik nem maw...' tih hlathute chuan mi rilru a luah hneh hle. He music video hian ni riat chhung lekin million view a kai a, Mizo mipui zat atanga chhut phei chuan namai lo tak a ni. 

Nula tlang valten an awm hmunah, 'Chhing mittui nen a liam ang suihlunglen. Nang tel lo hringnun zawh ing e. Tawn leh ni her se, ka rem tawh mawlh si lo' tih hla an sa rut rut a, hei hian an boruak leh zia a tilang chiang mai awm e. An hla thu lungkuai leh thluk ril raih mai hian mi rilru a luah hneh hle a ni. 

An music video hmuhnuam tak mai hi Osiama Pictures kutchhuak a ni a, recording hi Westend Studio te kutchhuak a ni thung. Official music video hi H.O.M YouTube chanel-ah en leh ngaihthlak theih a ni.