ZALEN June 09, 2026 : Nimin zing (Thawhtanni) dar 12:30 vel khan Aizawl Observation Home, Durtlang North atangin mi paruk (6) an tlan chhuak a, tlan chhuakte hian lirthei, pawisa leh mobile phone bakah anmahni kaihhnawih case file-te an ru chhuak a ni.

Bawngkawn Police Station atanga ZALEN thudawn danin, tlanchhuak mi parukte hian Observation Home atang hian Eeco Van (MZ 01 Z 0778), Realme C61 mobile phone leh pawisa fai Rs 1,50,000/- vel an ru tel a, Hemi bakah hian anmahni thubuai ziahna 'case file' an ru chhuak tel bawk.

Mizoram Child Protection Society enkawl lai Aizawl Oberservation Home atanga tlan chhuakte zingah hian May ni 26 a Chanmari Veng, Grand Hotel bula mi sawisak rawntu kum tling lo (juvenile) te pawh an tel niin police lam chuan ZALEN an hrilh.

He thu buatsaih lai thleng hian heng mi paruk leh an thil rukte hi man an la ni lo a, Guwahati an thleng tawh nia hriat a ni a, hemi ai hla pawh an thleng tawh niin an ring bawk a, zawn zui mek an ni.