February 27, 2023; Home minister Lalchamliana'n vawiin budget sawihona a Dampa bialtu Lalrintluanga Sailo leh Serchhip bialtu Lalduhoma te thu inchuh, chief minister Zoramthangan thubuai a neih leh neih loh chungchang sawifiahin, home department ngaihdanah chuan chief minister in thubuai a nei lo tih house a hrilh.

Chief minister in thubuai a neih leh neih loh chungchang-ah vawiin chawhnu budget sawihona ah MLA pahnih ten thu inchuh an nei a, chu chu Dampa bialtu MLA ngenna leh Deputy speaker in sawifiah tura a tih angin home minister in police lam thlir dan a sawi.

Zanin a a demand hrang hrang a khaikhawmna ah hemi chungchang hi sawiin, home minister chuan, Assembly house a CM in thubuai a neih chungchang sawichhuah a nihin police lam a zawtfiah tih a sawi a, Lengpui Airport sak chungchangah MPYCC leh Mizoram First Movement ten complaint/FIR an thehluh thu te, FIR chu police ngaihdan chuan case a la tlin loh thu te a sawi. 

"Kan hriatzui danin Lokayukta in ACB ah preliminary enquiry (PE) ti turin thupek a chhuah a, chuvang chuan police ngaihdan chuan case a la tling lo a, PE in case nei tlak a ni e a ti maithei a, ngaihtuah zui tlak a ni lo e a ti thei a, chuvangin home department ngaihdan chuan kan CM in case a nei lo," home minister chuan a ti. "Lokayukta lam chu ka hrelo a, mi'n corruption case emaw criminal case emaw a neih chuan police in an register tur ni awm tak a ni a, police lamin chutiang register a awm lo tih an sawi," a ti bawk.