Aizawl: Nimin  khan Mizo Hnam Runah MNF party OB te chuan Sr.Vice President Tawnluia hovin emergency meeting an nei a, Mizoram chhung ngeia Assam Police te invilik chiam mai leh zirlai kut an thlak chiam mai chu tha lo an tih thu an sawiho a ni. OB Meeting chuan, “Hetiang khawpa Mizoram chhunga Assam sorkar a chet hnuah leh Mizo zirlai tam takin hliam nasa tak an tawrh hnu pawh a, Mizoram sorkarin hnam chhan nana inpe Mizo zirlaite thlavang pawh a hauh ngam lo hi kan dem tak zet a. Hetiang baka law & order hlawhchhamna hi MNF chuan a awmin kan hre lo. Law & order kengkawh zo lo CM Pu Lal Thanhawla leh Home Minister Pu R Lalzirliana te hi bang vat rawh se,” tiin Resolution an pass a. Zirlai vuak leh kahhliamte sorkarin zangnadawmna pe ngei turin an phut. Nimin tlai vek khan Mizoram Larsap hnenah Assam police-in zirlai kut an thlak leh lirthei hal a nih thuah inrawlh tura ngenna lehkha an thehlut bawk.