ZALEN Oct. 13, 2025: Vawiin khan Home Minister K Sapdanga chu Mizoram Journalist Association, Serchhip District Silver Jubillee lawmnaah Khualzahawm a ni a, programe tan hmain Serchhip ZPM office-ah Serchhip ZPM party hruaitute nen inkawmhona neih a ni a, party hruaitute hian khawtlang hmasawnna tur mamawh hrang hrangte lo thlenin Home Minister chuan a theih anga bawhzui a nih tur thu a sawi. 

He hunah hian K. Sapdanga chuan thusawiin, "Mizoram Police-ah hian tun dinhmunah post ruak 3,647 a awm mek a, kum tin hian thihna avang leh pension avangtein post ruak 200 chuang a awm zel ang a ni. Police indaihlohna a nasa em em a, kalpaha inlak ngawt a theih a ni lova, chhungte boral tawh ai pawh lak ngawt theih a ni tawh lo a ni. Dan ang taka thiltih a ngai tawh a, kum 2021 aṭang vel khan Court leh Constitution a thikthu a chhe riau a ni, sorkar hmasate kha Dan khaikhup san chungchangah keini aiin an lo ngam hret a, sorkar liamta pawh kha an hun hnuhnung lamah chuan an fimkhur tawh hle a ni. Police post ruak tam lutuk tihziaawmna turin Home Department chu a inbuatsaih leh mek a, DP&AR leh Law Department-ah te dilna thehluh leh a ni dawn a. Police lak hnuhnungberah khan Post 1,100 kan dil a, DP&AR leh Law Department lamin mi 250 min phalsak thung a ni. Police Headquarters atangin survey kan nei mek a, district tina Police indaih loh dan report lakkhawm a ni mek bawk," a ti.

Home minister chuan, "Hmun hrang hranga Police Quarters te pawh an awngrawp tawh hle a, hei pawh hi a chhiat dan leh tihzui dan tur November thlaah report kim theih beisei a ni a, thuamthat tum a ni bawk. Mizo Territorial Army din tur pawh thla tharah advertisement chhuah tum a ni a, a tirah mi 75 lak tura tih niin, kan hotuten an dil belh leh a, mi 150 lak phalsak kan ni tawh a ni," a ti bawk.