ZALEN January 10, 2026 : K. Sapdanga, Home Minister chuan vawiin khan OKM Home Phunchawng tlawhin an Sports Closing Function a hmanpui. He hun hi OKM Founder Lalruatpuii chuan a kaihhruai a, Worker Vanlalrengpuia chuan hunserh hmangin, Upa R. Lalnunthara, Secretary Advisory Board chuan report a pe a, OKM Home-ah hian thawktu mi sawmli (40) vel leh zirlai mi zali (400) bawr an awm mek a ni. Khuallian hian Sports an neih zawh taka lawmman a sem nghal bawk.

K. Sapdanga chuan thusawiin, "OKM Home-a awm zawng zawng kum thar chibai ka buk a che u. Kum 2 kan sorkar chhungin tun tum hi tum khat ka rawn kalna a ni a, ka rawn kal har em avangin in ngaihdam ka dil a ni. Hei a hmingin Home Department lam chang turin kan hotuten min han ruat a, ka thawhpui turin Pu Tetea, Excise Minister atan an ruat bawk a. He mawhphurhna kan lak ve phat atangin Pu Tetea nen ruihhlo lo luh tamna Champhai lam kan han tlawh a, eng tin nge kan thalaipui tam tak run mektu ruihhlo hi kan ramah tun aia nasaa kan do ang tih kan ngaihtuah a, tun hmain tlawmngai pawl atangin hotute hnungzuiin a hmalatu pawlah ka lo tel ve tawh thin a, tuna ka rilrua awm ta ber chu kan duh vang reng ni lo eng emaw avangin sual khurah hian kan tlu thin a, ruihhlo bawiha kan tang chhuak tur hian tum tlatna a awm a ngai niin ka hria."

"Nghei theih loh, sim theih loh thil hi a lo awm tak tak lo a, min a tum tak tak chuan a sim thei ngei a ni tih hi thil chiang tak a ni. Vawiina ruihhlo bawiha tang mek te pawh kan damna turin eng harsatna emaw Pathianin kan chungah hian a dah a, heng harsatna kan tawh te min ti chheltu lo ni mawlh se. Sorkar pawhin a tum lian ber chu nun kawng dik kan zawh theihna tura dan kenkawh te, hrem ngai hrem te, siam that ngai siam that te a lo ni a, chu tho chu Excise Department lam pawhin an tum a ni. Vawiinah he laia awm te ka fak em em che u, in nihna in pawm a, damna duhin he lai hmun in pan hi a ni. Sorkar ang pawhin he hmunah hian kan theih ang ang ti turin kan inhawng a ni," a ti bawk.

Sapa chuan, "He Camp hi Pathian ngaih chuan Kohhran ropui tak a ni a, damna zawnga punkhawmna hmun a nih avangin thlarau thianghlim pawhin hna a thawk zel ang tih ka ring tlat a ni. Bible hi han chhiar han chhiar ila, hmangaihna hi a bul a ni a, harsatna kan tawhna hmunah leh natna hrang hrang kan tawhna hmunah pawh Pathian hmangaihna hian min thlahthlam hauh lo tih hi a lang chiang hle. Sum leh pai te, hriselna te pawh hi hlimna a lo ni chiah lo, hlimna chu Pathiana mi a innghah tlatna hmunah a awm thin a ni. Engkim tuar chhuak turin inbuatsaih ila; taksa, rilru leh thlarau damna chang ngei turin duhsakna ka hlan che u a, damna famkim changa he hmun rawn chhuahsan theuh turin duhsakna ka hlan a che u," a ti bawk.