ZALEN August 8, 2023 : Vawiin khan 34th Thorang A/C bialtu MLA Zodintluanga chuan tunhnai ruahsur nasa avanga khuarel chhiatna nasa tak a bial chhunga thlengah; Home Minister Lalchamliana, Disaster Management & Rehabilitation Department changtu leh Er. B. Lalawmpuia, PWD Engineer-in-Chief charge la mêkte an Office-ah a tlawh.

Thorang bialtu MLA chuan a bial chhunga Tuichawng lui lian avanga Andermanik khua tuiin a chim avanga harsatna thleng mek te. Ruahsur nasa avanga Thorang bial chhung hmun hrang hranga chhiatna tawk mekte leh Phairuang Bunghmun Road inkalpawhna Tleu Quarry chim avanga pingin harsatna a thlen mêkte Disaster Management & Rehabilitation Dept. changtu Minister Pu Lalchamliana hnenah leh PWD Engineer-in-Chief hnenah a rang lama puihna a thlen.

Minister Lalchamliana leh PWD Engineer-in-Chief Er. B. Lalawmpuia te hian Thorang bialtu MLA-in an Office-a a dawr lai hian hma laksak nghalin, a ṭul ang angte an biak pawh sak nghal a ni.

Er. B. Lalawmpuia hian Tleu Quarry chim hi kal tlang leh theih tura a theih ang anga hmalak nghal a nih tur thu Thorang bialtu MLA hi a hrilh a, theihtawp an chhuah tur thu a sawi. Home Minister Lalchamliana pawhin Lunglei DC be pawp nghalin, thil awm dante sawiin, a rang lama hma lak nghal a nih tur thu Zodintluanga hi a hrilh bawk.