ZALEN November 14, 2024 : MNF Thalai chuan Manipur-a zohnahthlak Zosangkimi Hmar rawng taka thah a nih bakah volunteer 10 lai CRPF ten an kahhlum laia Mizoram sawrkar a ngawi tlat chu demawm an ti a. Chief Minister tan BJP sawrkar dem zawnga tawngchhuah a remlo anih pawh Home Minister tal hi tawngchhuak ve rawh se, an ti.

Home Minister hian MLA Election dawn khan Manipur-a zohnahthlak ten harsatna an tawh chuan a hmunah an kalchilh tur thu a puang a, thla 10 chuang an sawrkar chhungin engmah an ti leh si lo hi a demawm tak zet a ni, an ti.

MNF Thalai chuan, "Tunhnaiah Manipur-ah zohnahthlak Pi Zosangkimi Hmar chu rawng taka thah a ni a.Thah anih dan leh thah anih chhan pawh hnam issue ngei a ni. Hei bakah hian kan unau mi 10 laite chu hnam venghim tura an chetnaah tenawm taka bumin rawng taka thah an ni."

"Silchar Medical College a an ruang postmortem chungchangah pawh kalphung pangngai pelin Manipur sawrkar thuneituten Doctor te lakah harsatna an siam niin alang a, kan thu dawn danin ruang 6 postmortem zawh hnuah ruang 4 postmortem zui chu khapsak an ni," a ti bawk.

MNF Thalaite chuan Zosangkimi rawng taka thah a ni chu an dem a, hnam pasalthaten hnam chhan nana an nunna an hlan chu ropui an ti a. Theih chin chinah Manipur leh khawvel hmun danga zohnahthlak harsatna tawkte tanpui turin tan an lak zel tur thu an sawi.