MSL khelh mekah, nizan khan Chanmari Vikings chu Mission Veng Hotshots-in 86-72 in an hneh. Tihian point 12 nei Vikings hi an tla a, zanin a inkhel tur Tuikual South hi chak lo mah se Play-in khel turin an tling chiang tawh.

Inrinni zar dar 8 hian point 12 nei mek Chanmari Vikings hian Khatla TBL an hmachhawn leh dawn a, an chak a nih chuan point 14 an nei ang. Point 13 nei mek Tuikual South hian zanin dar 8 hian an hneh hnu Zarkawt BCA an khel leh dawn a, chaklo mahse point 14 an hmu dawn tho a, head to head-ah Vikings aia an that zawk vangin Play-in (Semi-final) hi an lut dawn tho a ni. 

Mission Veng Hotshots hian league round an khel zo tawh a, play-in khel turin an tling tawh. Tunah hian point 17 neiin table-ah hmah an hruai mek. Zanin leh naktuk zana khel tur Zarkawt BCA leh Khatla TBL te hian point 16 ve ve neiin an leh pel thei thung. Chanmari Vikings hian Khatla TBL hmachhawn tur la nei mahse PLay-in khel turin an tling zo tawh lo va. Zanin khel tur table-a palina Tuikual South an hmakhalh thei tawh lo a ni. 

Nizan inkhelah hian Mission Veng Hotshots hi Play-in khel tura tling chiang tawh an nih vangin an inringtawk a, chak ngi mamawh Vikings erawh first quarter atangin an talbuai deuh nghal. First quarter-ah hian Hotshots-in point 23 an thawhchhuah laiin Vikings lam hian point 15 chiah an lut. Second quarter-ah erawh team hnih te an lut thei a, point 20 ve ve lutin an in hnehtawk. 

Quarter thumnaah hian  Mission Veng Hotshots lamin point 23 score-in Vikings lamin point 21 an thun a, quarter tawp berah hian Vikings lam chu tang viau mahse point 16 bak an nei phak lo, Hotshot erawhin point 20 an thun thung. 

Nizan inkhehah khan foreign player te aiin tualchhung mizo tlangval te an chetha zawk a, Mission Veng Hotshots tan point thun tam ber Lalrozama chuan point 24 a thawkchhuak. Chanmari Vikings tan mizo player bawk Moses Lalmuanzova chuan point 35 zet a thawk chhuak a, an foreign player Raymond Edward Miller Jr. erawhin point 11 chuah a thun thei thung. 

                 TT-Period 1 / Period 2 / Period 3 / Period 4

Hotshots : 86  -  23   - 20     - 23     - 20
Vikings    :72   - 15    - 20     - 21     - 16

Mission Veng Hot Shots
Lalrozama - 24 pts - 1 rebound - 1 block - 1 assist.
Joshua Aaron Keyes - 23 pts - 17 rebounds - 2 blocks - 8 assists - 1 steal.
Eddie Zaithanmawia - 21 pts - 6 rebounds - 1 steal.
Samson Lalchhuanawma - 9 pts - 4 rebounds - 1 steal.

CHANMARI VIKINGS
Moses Lalmuanzova - 35 pts - 7 rebounds - 2 blocks - 2 assists.
Raymond Edward Miller Jr. - 11 pts - 8 rebounds - 2 blocks - 1 assists - 1 steal.
Moses Zoremmawia - 8 pts - 7 rebounds - 2 blocks - 2 assists - 5 steal.
Michael F. Lalawmpuia - 6 pts - 4 rebounds - 6 assists.