Aizawl; Naktip Thawhlehni atanga tan tur Mizoram lagislative Assembly Session atan Zirtawpni thleng khan sawrkar bill 2, private member resolution 5, zawhna (starred question) 243, ziaka chhan chi zawhna (unstarred question) 43 te a lut tawh a, sawrkar bill dang 2 la luhbelh tura beisei a nih bakah House-a pharh tur sorkar lehkha pawimawh 5 hmuh a ni tawh bawk a ni. Sawrkar bill ngaihtuah tura lutte hi bill thar, ‘The Mizoram Animal Control and Taxation Bill, 2014' leh dan ding lai siam thatna tur, ‘The Lushai Hills District (Village Council) Amendment Bill, 2014' te an ni. Private member resolution 5 te hi MNF MLA Lalruatkima thehluh vek an ni a, resolution ah hian 'hmarchhak mite enhranna awm thin hi a dalna/rehna turin dan siam ni rawh se' tih lam hawi a ni a, tun dinhmunah private member reolution dang lut a a awmloh vangin hei hi Zirtawpni (Nov.14) ah sawiho a ni ang. Session hi November ni 26 thleng neih a ni dawn a, session tanni ah Finance Minister Lalsawta'n budget a pharh ang.